Atyraý oblysy Aqkól aýylynda bilim ordasyn aidalaǵa salǵan. Sonyń saldarynan balalar elsiz dalamen qatynap oqyp júr. Qara jolmen úsh shaqyrymnan asa jaiaý júrýge májbúr, dep habarlaidy dalanews.kz "KTK" telearnasyna siltep.
Biyl ashylǵan bilim ordasy aýyldyń shetinde. Balalar tym alys ornalasqan jańa mektepke jaiaý sabylyp sharshaǵan. Elsizge salǵan mektepke bala túgili, eresekter "entigip áreń jetemiz" deidi. Olar aldaǵy jaýyn-shashyn men qystyń qaýpin aityp, shyr-pyr etedi.
Myńǵa jýyq bala aidalaǵa salynǵan mektepke qara jolmen qatynaidy. Ainala sor, bir jaǵy zirattar. Eń soraqysy, aýyl syrtynda it-qus pen jabaiy ań da kóp. Ata-anany alańdatatyn basty qaýiptiń biri de osy. Mektep shalǵai ekenin aityp shyryldaǵan halyqtyń bar talaby - oqýshy tasymaldaityn avtobýs. Biraq jergilikti bilik "jol joq" dep avtobýs shyǵarýǵa asyqpai otyr.
"Qazir óz kúshimizben bul máseleni sheshetindei mehanizm joq. Sebebi oblystyq bilim berý basqarmasyna osy másele boiynsha taǵy da usynys ázirlep jatyrmyz", - dedi Qurmanǵazy aýdany bilim bóliminiń basshysy Jiger Janqanov.
Bul mektepte oqityn myńnan asa balanyń 58-i ǵana temirjol ótkelinen ótetin bolǵandyqtan, kólikpen tasymaldanady eken. Qalǵan myń balanyń qaýipsizdigine alańdaǵan aýyl halqynyń endigi bar úmiti - oblys basshylyǵy.
