Atyraý oblysynda iri qara maldyń jappai qyrylýy fermerlerdi alańdatyp otyr. Eń soraqysy – maldyń neden ólgeni áli kúnge deiin naqty anyqtalmaǵan. Jergilikti turǵyndardyń aitýynsha, aýrý belgileri baiqalǵannan keiin birneshe kúnniń ishinde mal álsirep, ólip jatyr, dep habarlaidy dalanews.kz.
Almaty.tv málimetinshe, jaǵdai Kenózek aýyldyq okrýginde tirkelgen. Munda fermerler kem degende 13 bas iri qarasynan aiyrylǵan. Aýrý juqqan maldyń ólekseleri arnaiy oryndarǵa shyǵarylyp, órtelip, keiin kómilgen. Kásipker Raia Muhanbetova 13 bas malynan aiyrylǵanyn aityp, saraptamalar júrgizilgenimen, naqty diagnoz qoiylmaǵanyn jetkizdi.
Al fermer Erkin Sháripovtiń sózinshe, ótken jyly da osyǵan uqsas jaǵdai bolyp, sebepsiz 20-30 bas mal qyrylǵan. Jergilikti sharýalar aýrýdyń ózge qoralarǵa da taraýynan qaýiptenip otyr.
Kenózek aýyldyq okrýginiń ákimi Edýard Ospanovtyń aitýynsha, maldan, sýdan jáne shópten alynǵan synamalarda eshqandai juqpaly aýrý anyqtalmaǵan. Sonymen qatar ótemaqy tek aýrý resmi túrde rastalǵan jaǵdaida ǵana tólenedi. Alaida ólgen maldar qazirdiń ózinde joiylǵan, al vaktsinatsiialaý jumystary ázirge josparlanyp otyr.
Bul oqiǵa Qazaqstandaǵy veterinariialyq baqylaý júiesine qatysty suraqtardy qaita kóterdi. Sońǵy jyldary eldiń ár óńirinde maldyń jappai qyrylýy tirkelgenimen, keibir jaǵdailarda naqty diagnoz qoiylmai keledi.
Buǵan deiin Batys Qazaqstan oblysynda da mal arasynda qaýipti indet belgileri baiqalǵany týraly habarlanǵan. Sol kezde veterinariia ǵylymdarynyń doktory Ǵaisa Absatirov klinikalyq belgilerge súiene otyryp, bul aýsyl bolýy múmkin degen pikir aitqan. Alaida Aýyl sharýashylyǵy ministrligi zerthanalyq rastaý joq ekenin alǵa tartyp, aýrýdyń taralǵanyn moiyndamaǵan.
Sarapshylardyń pikirinshe, naqty diagnoz qoiý tek meditsinalyq másele emes. Eger aýrý resmi rastalsa, memleket fermerlerge ótemaqy tóleýge, karantin engizýge jáne halyqaralyq seriktesterdi habardar etýge mindetti bolady.
Aita keteiik, biyl mamyr aiynda Qazaqstan halyqaralyq deńgeide aýsyldan taza el mártebesin alǵan bolatyn. Bul jetistik eldegi biologiialyq qaýipsizdik júiesiniń nátijesi retinde baǵalanǵan.
Alaida óńirlerde maldyń belgisiz sebeptermen qyrylýy jalǵasyp jatqandyqtan, fermerler veterinariialyq qyzmettiń jumysyna qatysty suraqtar kóbeiip otyrǵanyn aitady. Olar naqty diagnoz qoiylyp, máseleniń túpki sebebi anyqtalmaiynsha, mundai jaǵdailardyń qaitalaný qaýpi saqtalady dep alańdaidy.
