Атырау облысында ірі қара малдың жаппай қырылуы фермерлерді алаңдатып отыр. Ең сорақысы – малдың неден өлгені әлі күнге дейін нақты анықталмаған. Жергілікті тұрғындардың айтуынша, ауру белгілері байқалғаннан кейін бірнеше күннің ішінде мал әлсіреп, өліп жатыр, деп хабарлайды dalanews.kz.
Almaty.tv мәліметінше, жағдай Кенөзек ауылдық округінде тіркелген. Мұнда фермерлер кем дегенде 13 бас ірі қарасынан айырылған. Ауру жұққан малдың өлекселері арнайы орындарға шығарылып, өртеліп, кейін көмілген. Кәсіпкер Рая Мұханбетова 13 бас малынан айырылғанын айтып, сараптамалар жүргізілгенімен, нақты диагноз қойылмағанын жеткізді.
Ал фермер Еркін Шәріповтің сөзінше, өткен жылы да осыған ұқсас жағдай болып, себепсіз 20-30 бас мал қырылған. Жергілікті шаруалар аурудың өзге қораларға да тарауынан қауіптеніп отыр.
Кенөзек ауылдық округінің әкімі Эдуард Оспановтың айтуынша, малдан, судан және шөптен алынған сынамаларда ешқандай жұқпалы ауру анықталмаған. Сонымен қатар өтемақы тек ауру ресми түрде расталған жағдайда ғана төленеді. Алайда өлген малдар қазірдің өзінде жойылған, ал вакцинациялау жұмыстары әзірге жоспарланып отыр.
Бұл оқиға Қазақстандағы ветеринариялық бақылау жүйесіне қатысты сұрақтарды қайта көтерді. Соңғы жылдары елдің әр өңірінде малдың жаппай қырылуы тіркелгенімен, кейбір жағдайларда нақты диагноз қойылмай келеді.
Бұған дейін Батыс Қазақстан облысында да мал арасында қауіпті індет белгілері байқалғаны туралы хабарланған. Сол кезде ветеринария ғылымдарының докторы Ғайса Абсатиров клиникалық белгілерге сүйене отырып, бұл аусыл болуы мүмкін деген пікір айтқан. Алайда Ауыл шаруашылығы министрлігі зертханалық растау жоқ екенін алға тартып, аурудың таралғанын мойындамаған.
Сарапшылардың пікірінше, нақты диагноз қою тек медициналық мәселе емес. Егер ауру ресми расталса, мемлекет фермерлерге өтемақы төлеуге, карантин енгізуге және халықаралық серіктестерді хабардар етуге міндетті болады.
Айта кетейік, биыл мамыр айында Қазақстан халықаралық деңгейде аусылдан таза ел мәртебесін алған болатын. Бұл жетістік елдегі биологиялық қауіпсіздік жүйесінің нәтижесі ретінде бағаланған.
Алайда өңірлерде малдың белгісіз себептермен қырылуы жалғасып жатқандықтан, фермерлер ветеринариялық қызметтің жұмысына қатысты сұрақтар көбейіп отырғанын айтады. Олар нақты диагноз қойылып, мәселенің түпкі себебі анықталмайынша, мұндай жағдайлардың қайталану қаупі сақталады деп алаңдайды.
