Atyraý munai óńdeý zaýytyndaǵy órtke bailanysty qylmystyq is tergelip jatyr, dep habarlaidy dalanews.kz.
Atyraý oblysynyń Tótenshe jaǵdailar departamenti atalǵan fakti boiynsha QR Qylmystyq kodeksiniń 292-baby – «Órt qaýipsizdigi talaptaryn buzý» boiynsha sotqa deiingi tergeý júrgizip jatyr.
Órt 25 tamyzda jabyq úlgidegi mehanikalyq tazartý qurylystarynyń tundyrǵyshynda bolǵan. Nysannyń ishinde munai shlamy janǵan. Oqiǵa kezinde onda eshqandai jumys júrgizilmegen.
Zaýyttyń habarlaýynsha, tútin týraly aqparat 25 tamyzda saǵat 12:55-te «112» pýltine túsken. Nysannyń ereksheligi eskerilip, Tótenshe jaǵdailar ministrliginiń kúshteri oqiǵa ornyna shaqyrýdyń joǵary dárejesi boiynsha jiberilgen.
Órtti sóndirýge TJM-niń, «Semser órt sóndirýshi» qyzmetiniń, ATMA áýejaiynyń jáne NCOC kompaniiasynyń apattyq-qutqarý qyzmetiniń shamamen 65 qyzmetkeri men 19 tehnikasy jumyldyrylǵan. Oqiǵa ornynda jedel shtab jumys istep, tartylǵan kúshter men quraldardyń is-qimyly úilestirilgen.
Órt saǵat 13:42-de oqshaýlanyp, jalynnyń taralýy toqtatylǵan. Keiin órt tolyq sóndirildi. Zardap shekkender joq.
Atyraý oblysynyń TJD tergeý barysyna qatysty ózge málimetterdi jariialamady. Vedomstvo muny Qylmystyq-protsestik kodekstiń 201-babymen túsindirdi. Atalǵan bapqa sáikes, sotqa deiingi tergep-tekserý derekteri jariia etýge jatpaidy.
Sonymen qatar Atyraý munai óńdeý zaýytyndaǵy órttiń naqty sebepterin anyqtaý úshin arnaiy komissiia jumys istep jatyr.
Zaýyttyń málimetinshe, órt kásiporynnyń qalypty jumysyna áser etpegen.
