Qazaqstannyń Atom energıasy jónindegi agenttigine qarasty Atomdyq qadaǵalaý jáne baqylaý komıtetiniń tóraǵasy bolyp Darhan Alıaqparov taǵaıyndaldy.
Ol bul qyzmetke deıin 2020 jyldan beri Energetıka mınıstrliginiń Atomdyq jáne energetıkalyq qadaǵalaý men baqylaý komıteti tóraǵasynyń orynbasary qyzmetin atqarǵan, dep habarlaıdy Dalanews.kz.
Darhan Alıaqparov eńbek jolyn 2008 jyly «Qazaqmys korporasıasy» JSHS-niń Jezqazǵan jylý elektr ortalyǵynda bastaǵan. Osynda ol qarapaıym mashınıst-baqylaýshy qyzmetinen bastap, stansıa aýysymynyń bastyǵyna deıin kóterilgen.
2014 jyldan beri Alıaqparov atomdyq jáne energetıkalyq qadaǵalaý salasynda túrli basshylyq laýazymdar atqaryp keledi. Ol osy aralyqta Astana qalasy ákimdigi men Energetıka mınıstrliginiń qurylymdarynda da jaýapty qyzmetter atqarǵan.
Aıta keteıik, Qazaqstanda 2025 jyldyń naýryzynda Atom energıasy jónindegi agenttik qurylǵan bolatyn. Jańa vedomstvoǵa buryn Energetıka mınıstrliginiń quzyrynda bolǵan ýran óndirý men atom energıasyn beıbit maqsatta paıdalaný fýnksıalary berilgen. Agenttikti burynǵy Energetıka mınıstri Almasadam Sátqalıev basqarady.
Qazir agenttik tóraǵasynyń eki orynbasary bar. Olar – «Qazatomónerkásip» ulttyq kompanıasynda basqarýshy dırektor qyzmetin atqarǵan Áset Mahambetov jáne buryn «Qazaqstandyq atom elektr stansıalary» AQ-nyń bas dırektory bolǵan Tımýr Jantıkın.
