Búgin Atyraý oblys ákimi Serik Shápkenov úsh jasar Dinmuhammed Jumajanmen jáne onyń ata-anasymen júzdesti. Búldirshinniń qaladaǵy Atyraý yqshamaýdanyndaǵy Oraza ait toilanǵan oryndy jinastyryp júrgen videosy áleýmettik jelide keń taraǵan edi, – dep habarlaidy Dalanews.kz Atyraý oblysy ákiminiń baspasóz qyzmetine silteme jasap.
Serik Shápkenov Dinmuhammedtiń tárbiesi men qorshaǵan ortaǵa degen súiispenshiligine riza bolyp, raqmetin aitty. Ol sondai-aq QR Prezidenti Ákimshiliginiń jetekshisi Aibek Dádebaidyń Memleket basshysy atynan joldanǵan hatyn tabystady.
– Keide kóp sózdiń ornyna bir ǵana istiń ózi jetip jatady. Dinmuhammed kishkentai ǵana oiyn balasy bolsa da, onyń áreketi kópke oi saldy. Álbette, ol muny bógde bireýden kórip emes, óziniń otbasynda tazalyq pen tártiptiń mánin túsinip ósip kele jatqandyqtan jasady. Bul – tek tárbieniń emes, naǵyz otansúigishtiktiń úlgisi. Óz Otanyna shyn berilgendiktiń belgisi. Osyndai áreketter Memleket basshysynyń “Taza Qazaqstan” bastamasy ýaqytsha is-shara ǵana emes, ár azamattyń ómir salty bolýy qajettigin kórsetedi. Kishkentai Dinmuhammedtiń jasaǵany – tazalyqty árkim ózinen bastaýy kerek degen úndeý, – dedi S. Shápkenov.
Dinmuhammedtiń ákesi Erjan Hairoshevtiń aitýynsha, turǵyndardyń biri ulyn videoǵa túsirip, áleýmettik jelige júktegen.
– Biz ózimizdiń yqshamaýdanda Oraza ait meiramyn keń kólemde toiladyq. Ulymyzdyń áreketi búkil eldiń yqylasyna bólenedi dep oilamadyq. Onyń tili kesh shyqty, sosyn balabaqshaǵa berdik. Sol jaqtan úirengeni de bar shyǵar. Óz otbasymyzda da tazalyqqa mán beremiz, senbilikterden qalmaimyz. Men óz ulymnyń eldiń patrioty bop er jetkenin qalaimyn, – deidi E. Hairoshev.
Keiin oblys ákimi Dinmuhammedke eskertkish syilyqtar tapsyryp, ata-anasyna alǵys aitty.
Eske salaiyq, Atyraýda “Taza Qazaqstan” respýblikalyq ekologiialyq aktsiiasy belsendi júrip jatyr.
Budan bólek, eldi mekenderdi kógaldandyrýdyń aimaqtyq jospary boiynsha 63 gektar aýmaqta 145700 aǵash otyrǵyzylmaq
