Marqumnyń týystarynyń sózinshe, 4-shi balasyn aýylda emes, Atyraýdaǵy bilikti dárigerlerdiń qolynda bosanamyn dep kelgen oǵan der kezinde meditsinalyq kómek kórsetilmepti. Qaiǵyly oqiǵadan keiin keshirim surap kelgen dárigerlerdi qara jamylǵan otbasy endi sotqa súireimiz dep otyr.
Gúldana Jekenovaǵa aýyldaǵy dáriger «balanyń joldasy birinshi kelip tur» dep, qalada bosanýǵa keńes bergen eken. Qujattaryn da rettep, shyǵaryp salypty. Marqumnyń sińlisi Janyrystyń aitýynsha, Atyraý oblystyq perinataldyq ortalyǵyndaǵylar Gúldanany portalǵa tirkelmegensiń dep, bir túnetip shyǵaryp jibergen. Sol kúni jedel járdemmen qalalyq perzenthanaǵa qaita túsken ol bir táýlik qinalyp, bosana almai, jan tapsyrady. «Almagúl» perzenthanasyndaǵy Raisa Zaharqyzy, Janar Dýetova men Nazgúl Muhambetjanova solar qaramai, apamdy ózderi qolymen óltirip otyr, men solardy kináli deimin. Óz kózimmen kórdim, qinady birshama apamdy”, – deidi marqumnyń sińlisi Janyrys Jekenova.
Osy oqiǵadan soń aty atalǵan dárigerler kelinshektiń artynda qalǵan jubaiy men 3 balasynan keshirim surap kelipti. Myna kadrlarda olar óz kinálaryn moiyndaýda. Al oblystyq densaýlyq saqtaý basqarmasyndaǵy málimet boiynsha, qazir tekserý jumystary júrip jatyr. Kelinshektiń ólimi jazataiym jaǵdaidan bolǵan deidi ondaǵylar.
“100 paiyz dáriger kináli dep aita almaimyn. Biraq jatyr jyrtylǵan, qan ketken. Almatydan kelgen sarapshy aiaq asty bolǵanyn aitady”, – deidi Atyraý oblystyq densaýlyq saqtaý basqarmasy basshysynyń orynbasary Dina Kamelova.
Endi jańa jyldan keiin Astanadan, Almatydan sarapshylar keledi. Gúldana Jekenova kóz jumǵan myna perzenthana qyzmetkerlerinen oqiǵaǵa qatysty qandai da bir túsinik alý múmkin bolmady. Qazir oqys oqiǵanyń mán-jaiyn tiisti oryndar tekserip jatyr. Al marqumnyń týystarynyń aryzy boiynsha, qalalyq prokýrotýra búgin sotqa deiingi tergeýdi bastady.
