Atyraý oblysy Sarytoǵai aýylynda sý tasqyny kezinde turǵyndarǵa kómektesken Pshón esimdi ittiń ólimine bailanysty qylmystyq is qozǵaldy, dep habarlaidy Dalanews.kz.
Oblystyq politsiia departamentiniń málimdeýinshe, Qylmystyq kodekstiń 316-baby (“Janýarlarǵa qatygezdik kórsetý”) boiynsha sotqa deiingi tergeý bastaldy. Qazirgi ýaqytta oqiǵanyń barlyq mán-jaiy anyqtalýda.
Buǵan deiin oblystyq Aýyl sharýashylyǵy basqarmasy itti aýdandyq veterinariialyq stantsiia qyzmetkerleri atyp óltirgenin habarlaǵan bolatyn.
Resmi málimetke sáikes, 28 qarasha kúni Mahambet aýdanyndaǵy veterinarǵa jergilikti turǵyndardyń biri habarlasyp, aýlasynda qaraýsyz júrgen úsh ittiń ózine kedergi keltirgenin jetkizgen. Oqiǵa ornyna jetken mamandar itterge uiyqtatatyn oq (drotik) qoldanǵan. Eki it uiyqtatylyp, úshinshi it ózen jaqqa qashyp, belgisiz jaǵdaida qaza tapqan.
“Qazir aýdandyq prokýratýra men politsiia veterinariialyq stantsiia mamandarynyń is-áreketiniń zańdylyǵyn tekserýde. Tekserý nátijeleri boiynsha tiisti sharalar qabyldanady”, – delingen basqarma habarlamasynda.
Aita keteiik, buǵan deiin álemjelide kóktemgi sý tasqyny kezinde atyraýlyq turǵyndarǵa kómektesken “Pishón” esimdi ittiń atyp óltirilgeni týraly aqparat taraǵan edi.
Atyraý oblysynyń ákimi Serik Shápkenov ittiń ólimine bailanysty arnaiy tekseris júrgizilip jatqanyn málimdegen bolatyn.
Sonymen qatar májilis depýtaty Edil Jańbyrshin de qaiǵyly oqiǵaǵa bailanysty pikir bildirdi.
Depýtattyń aitýynsha, qazirgi zańnamada janýarlardy atýǵa tikelei ruqsat joq, biraq belgili bir jaǵdailarda shara qoldanýǵa múmkindik bar.
“Eger janýar agressivti minez kórsetse, adamǵa shabýyl jasasa nemese qutyrma aýrýyna shaldyqqan bolsa, ony shekteýge bolady. Biraq Atyraýda naqty ne bolǵanyn aitý qiyn, sebebi biz ol jerde bolǵan joqpyz”, – dedi Jańbyrshin Májilis dálizinde.
Sonymen qatar ol iesi bar itti óltirgender zań boiynsha jaýapqa tartylatynyn aitty.
“Eger it iesine tiesili bolsa jáne ony óltirse, bul zańǵa qaishy áreket bolyp sanalady. Mundai jaǵdaida jaýapkershilikke tartý kózdelgen. Tolyǵyraq málimet alý úshin Atyraýǵa baryp, jergilikti organnan suraǵan jón. Qazir bul oqiǵa boiynsha tekseris júrip jatyr”, – dedi depýtat.
