Atyraýda “QazTransOil” ulttyq kompaniiasynyń top-menedjerleri 6 milliard teńgeden astam qarajatty jymqyrdy degen kúdikpen tergelip jatyr. Bul týraly belgili jýrnalist Mihail Kozachkov óziniń Telegram-arnasynda málimdedi, dep habarlaidy Dalanews.kz.
Onyń aitýynsha, sot protsesi daýly ári rezonansty sipatqa ie bolǵanymen, tynysh ótip jatyr. Al kúdikke ilingenderdiń qatarynda “Magistraldy sý qubyry” JShS-niń burynǵy bas direktory Berik Salpek jáne onyń orynbasary Asqar Kúltumiev bar.
“Atyraýda úlken daýǵa ulasýy múmkin sot protsesi bastaldy”, – dep jazdy Kozachkov.
Jýrnalistiń málimetinshe, kúdiktiler 2020 jyly bastalǵan “Astrahan – Mańǵystaý” magistraldy sý qubyryn jańǵyrtý jobasy aiasynda iri kólemdegi qarjyny qoldy qylǵan. Atalǵan joba – Qiǵash ózeninen Atyraý men Mańǵystaý oblystaryna aýyzsý jetkizetin mańyzdy infraqurylym.
Kozachkov “QazTransOil” ulttyq kompaniiasy jobany iske asyrý úshin 17 milliard teńge bólgenin, al qubyrlardy aýystyrý barysynda qunnyń negizsiz 6,5 milliard teńgege kóterilgenin jazady. Onyń aitýynsha, qujat júzinde otandyq óndirýshiniń baǵasy kórsetilgenimen, is júzinde qubyrlar Reseiden áldeqaida arzan baǵaǵa satyp alynǵan.
“Baǵasy boiynsha bári otandyq óndirýshiden alynǵandai jazylǵan, al shyn máninde taýar Reseiden kelip, edáýir únem jasalǵan”, – dep atap ótti jýrnalist.
Kozachkov aqsha keiin birneshe jalǵan kompaniia arqyly ainalymǵa jiberilgenin, al Berik Salpek sol qarajatqa óziniń ushaq biletterin tólegenin jáne úshinshi bir adamnyń shotyna 11 million teńge aýdarǵanyn jazady.
“Berik Salpek merdiger kompaniianyń qarjysyn óz aqshasyndai jumsaǵan: ushaqpen ushýyna 5 million, taǵy 11 millionyn basqa adamǵa aýdarǵan”, – deidi Kozachkov.
Alaida bul is sotqa jetkenimen, Atyraý qalalyq qylmystyq ister jónindegi sottyń sýdiasy Nurtas Búlekbaev isti qylmystyq-protsestik zańbuzýshylyqtar anyqtalǵany úshin prokýratýraǵa qaitaryp jibergen.
Jýrnalistiń sózinshe, kúdiktilerdiń eshqaisysy qamaýǵa alynbaǵan. Olar bostandyqta júr, al Asqar Kúltumiev áli de sol qyzmetin atqaryp otyr, al Berik Salpek 2024 jyly kóktemde “QazTransOil”-da jańa qyzmetke – kommertsiia jónindegi basqarýshy direktor laýazymyna taǵaiyndalǵan.
“Bul óte oǵash kórinedi. Dúkennen oiynshyq urlasań, birden SIZO-ǵa ketesiń, al 6 milliard teńge urlasań, tek elden shyqpaýǵa qolhat jazasyń”, – dep túiindedi jýrnalist.
