«Oqýshylar qurastyryp shyǵarǵan dron ádettegidei áýede ushady jáne sý betinde júzip, kadrlar túsire alady» deidi STEM zerthana laboranty Láila Shyńdybaeva.
Dronnyń áýede ushý jyldamdyǵy sekýndyna 1,5 metrge teń. Sý betinde sekýndyna 2,5 metrge deiin júzedi. Ázirge synama túrindegi dron qýaty 6 minýtqa jetedi. Keiin qaita qýattalady. Sonymen birge, oqýshylar aǵash stanogy, 3D noýtbýkpen jumys isteýde.
STEM zerthana laboranty Láila Shyńdybaevanyń aitýynsha, laboratoriiada 3D printermen negizinen joǵary synyp oqýshylary jumys isteýde. Arnaýly baǵdarlama júktelgen printer kómegimen búginde oqýshylar telefon tireýishi, qumyralar, erekshe formattaǵy Abai kitabyn, breloktar, medaldar jasap shyǵarǵan.
STEM laboratoriiada úsh túrli fýnktsiia atqaratyn robottar jasalyp shyqty. Máselen, Mbot roboty kedergilerden ózdiginen burylý arqyly óte alady, ekinshi robot áýen arqyly qozǵalady. Úshinshi robot baǵdarlama arqyly arnaiy syzylǵan syzbalar kómegimen júredi.
«Álemdik deńgeidegi damyǵan laboratoriia matematika, injeneriia baǵytyndaǵy tehnologiialyq izdenisterge baǵyttalǵan. Joǵary synyp oqýshylary robottardy qurastyrýda, tómengi synyp oqýshylary ónim jasaýdyń joldaryn úirenip jatyr» deidi Saǵyz orta mektebi direktorynyń mindetin atqarýshy Meiramgúl Aiaǵanova.
2020 jyldyń qańtar aiynan bastap iske qosylǵan laboratoriia – aýyl muǵaliminiń jeńisi. Olai deitinimiz, atalmysh mekteptiń himik muǵalimi Aqynta Bisembieva 2019 jyly respýblikalyq ǵylymi jobalar baiqaýyna qatysyp, jeńimpaz atanǵan. Júldege osy zerthanany utyp alǵan.
«Sabaq negizinen klassika, estrada jáne ulttyq biler baǵytynda ótedi. Oqýshylar arasynda jaqsy nátijeler bar. Máselen, onlain túrde ótip jatqan «Jaryq juldyz» konkýrsynda úiirme qatysýshylarynyń shoqtyǵy biik tur» deidi Saǵyz orta mektebi janyndaǵy bi úiirmesiniń jetekshisi Baqyt Qoishyǵali.
Qazirgi ýaqytta bi úiirmesinde jiyrmadan astam oqýshy tálim alýda.
Eske sala ketelik, 424 oryndyq Saǵyz orta mektebi 2018 jyly qoldanysqa berilgen. Tiptik jobada salynǵan zamanaýi mektepte kadet synyby, óndiristik sheberhanalar, tigin tsehy, gimnastika ortalyǵy jáne TIR alańy bar. Oqýshy shyǵarmashylyǵyn damytý maqsatynda bilim ordasynda 16 úiirme jáne 4 klýb jumys istep jatyr.
