Atyraý qalasynda “Ańsar” jekemenshik balabaqshasynda oryn alǵan oqiǵadan keiin qylmystyq is qozǵaldy, dep habarlaidy Dalanews.kz.
Bes jastaǵy búldirshin aýyr jaraqatpen aýrýhanaǵa jetkizilgen. Alǵashynda balanyń basy qatty aýyra bastaǵany aitylǵan.
HALYQSTAN telegram arnasynyń málimetinshe, balabaqsha qyzmetkerleri anasyna habarlasyp, qyzynyń ózin jaisyz sezingenin jetkizgen. Olardyń aitýynsha, qyz bala baspaldaqtan qulap ketken. Alaida ata-anasy beinebaqylaý jazbasyn suraǵanda, balabaqsha ókilderi “sol sátte kameralar istemegen” dep jaýap bergen.
Aýrýhanaǵa jetkizilgen soń dárigerler qyzdan jabyq bas-mi jaraqatyn, mi shaiqalýyn jáne qos qolynyń súiegi synǵanyn anyqtady. Mamandardyń aitýynsha, balanyń emi uzaqqa sozylmaq.
Oqiǵadan keiin balabaqsha basshylyǵy áleýmettik jelilerdegi paraqshalaryn óshirip tastaǵan. Instagram-daǵy paraqshasynda mekemeniń “tehnikalyq sebepterge bailanysty” jabylǵany habarlanǵan.
Atyraý oblystyq politsiia departamenti bul jaǵdai boiynsha QR Qylmystyq kodeksiniń 140-baby, 2-bóligi (“Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tiisinshe oryndamaý”) boiynsha qylmystyq is qozǵalǵanyn rastady. Tergeý amaldary jalǵasyp jatyr.
Eske salsaq, maýsym aiynda Astana qalasyndaǵy №21 “Gúlder” balabaqshasynyń tárbielenýshileriniń ata-analary tárbieshiniń balalarǵa zorlyq-zombylyq kórsetkenin málimdegen bolatyn. Jarty jyl boiy búldirshinder únemi soqqyǵa jyǵylyp kelgen.
Týystarynyń aitýynsha, tárbieshi, balabaqsha meńgerýshisi men ádisker jaǵdaidan habardar bolǵanymen, eshqandai shara qoldanbaǵan. Keiinirek ishki kameralardan alynǵan beinematerialdar áleýmettik jelilerde taralyp ketti. Onda arnaiy kiim kigen áieldiń balalardy basynan, denesinen uryp, jerge iterip jatqan sátteri anyq kórinedi.
