اتىراۋ قالاسىندا “اڭسار” جەكەمەنشىك بالاباقشاسىندا ورىن العان وقيعادان كەيىن قىلمىستىق ءىس قوزعالدى، دەپ حابارلايدى Dalanews.kz.
بەس جاستاعى ءبۇلدىرشىن اۋىر جاراقاتپەن اۋرۋحاناعا جەتكىزىلگەن. العاشىندا بالانىڭ باسى قاتتى اۋىرا باستاعانى ايتىلعان.
HALYQSTAN تەلەگرام ارناسىنىڭ مالىمەتىنشە، بالاباقشا قىزمەتكەرلەرى اناسىنا حابارلاسىپ، قىزىنىڭ ءوزىن جايسىز سەزىنگەنىن جەتكىزگەن. ولاردىڭ ايتۋىنشا، قىز بالا باسپالداقتان قۇلاپ كەتكەن. الايدا اتا-اناسى بەينەباقىلاۋ جازباسىن سۇراعاندا، بالاباقشا وكىلدەرى “سول ساتتە كامەرالار ىستەمەگەن” دەپ جاۋاپ بەرگەن.
اۋرۋحاناعا جەتكىزىلگەن سوڭ دارىگەرلەر قىزدان جابىق باس-مي جاراقاتىن، مي شايقالۋىن جانە قوس قولىنىڭ سۇيەگى سىنعانىن انىقتادى. مامانداردىڭ ايتۋىنشا، بالانىڭ ەمى ۇزاققا سوزىلماق.
وقيعادان كەيىن بالاباقشا باسشىلىعى الەۋمەتتىك جەلىلەردەگى پاراقشالارىن ءوشىرىپ تاستاعان. Instagram-داعى پاراقشاسىندا مەكەمەنىڭ “تەحنيكالىق سەبەپتەرگە بايلانىستى” جابىلعانى حابارلانعان.
اتىراۋ وبلىستىق پوليسيا دەپارتامەنتى بۇل جاعداي بويىنشا ق ر قىلمىستىق كودەكسىنىڭ 140-بابى، 2-بولىگى (“بالالاردىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ”) بويىنشا قىلمىستىق ءىس قوزعالعانىن راستادى. تەرگەۋ امالدارى جالعاسىپ جاتىر.
ەسكە سالساق، ماۋسىم ايىندا استانا قالاسىنداعى №21 “گۇلدەر” بالاباقشاسىنىڭ تاربيەلەنۋشىلەرىنىڭ اتا-انالارى تاربيەشىنىڭ بالالارعا زورلىق-زومبىلىق كورسەتكەنىن مالىمدەگەن بولاتىن. جارتى جىل بويى بۇلدىرشىندەر ۇنەمى سوققىعا جىعىلىپ كەلگەن.
تۋىستارىنىڭ ايتۋىنشا، تاربيەشى، بالاباقشا مەڭگەرۋشىسى مەن ادىسكەر جاعدايدان حاباردار بولعانىمەن، ەشقانداي شارا قولدانباعان. كەيىنىرەك ىشكى كامەرالاردان الىنعان بەينەماتەريالدار الەۋمەتتىك جەلىلەردە تارالىپ كەتتى. وندا ارنايى كيىم كيگەن ايەلدىڭ بالالاردى باسىنان، دەنەسىنەن ۇرىپ، جەرگە يتەرىپ جاتقان ساتتەرى انىق كورىنەدى.
