Atyraýda basty kóshelerge qorshaý ornatqan qala ákimi Shákir Keikin kópshiliktiń synyna ushyrady, dep habarlaidy Dalanews.kz.
Egovpress telegram arnasyny usynǵan málimetke sáikes, sheneýnik múmkin bolatyn QR Prezidentiniń saparyna qyzý daiyndyq júrgizip jatqanǵa uqsaidy. Jergilikti turǵyndar uzyn ári biik jasyl qorshaýdy osy daiyndyqpen bailanystyrady. Aitýlarynsha, jańa sharbaq qarapaiym halyq turatyn úilerdiń eski, árkelki qorshaýlaryn jasyrý úshin qoiylǵan.
Videodaǵy turǵynnyń sózinshe, eki metrlik jasyl qorshaý Qurmanǵazy kóshesinen bastap kópirge deiin sozylyp jatyr. Qorshaýǵa bailanysty kóshe tarylyp, keibir úilerdiń kórinisin jaýyp tastaǵan. Kópshilik ony kósheni ásemdep, kórinisti retteý úshin jasalǵanyn atap ótti.
Sonymen qatar, kóshedegi aǵashtar kesilip, ornyna jańa taldar otyrǵyzylǵan. Jergilikti turǵyndar qorshaýdyń ýaqytsha álde turaqty ekenin bilmei otyr.
