Festıválde túrli maqsatty aýdıtorıalarǵa, ıaǵnı, ata-analar men mektep oqýshylary, jasóspirimder men túlekter, STEAM salasyna qyzyǵýshylyq tanytyp júrgen tálimgerler bilim berý salasynyń mamandaryna arnalǵan 10 tanymdyq seksıa jumys istedi. Erekshe atap óterligi, festıválǵa qatysýshylar «Integrity» qorynyń kásiptik baǵdarlaý testilerinen ótip, «ITeachMe» QQ-nan «Inklúzıadaǵy STEAM» salasy týraly bilip, YEMAA kópsalaly mádenıet ortalyǵy uıymdastyrǵan kórmeni tamashalaý múmkindigine ıe boldy.
«Biz qalanyń yntaly jáne shyǵarmashylyq turǵyndarynyń qaýymdastyǵyn qalyptastyrý múmkindigine úles qosyp otyrǵanymyzdy maqtan tutamyz. Abaı ortalyǵy eki jyl ishinde STEAM ınovasıalyq baǵdarlamalarynyń ortalyǵyna, eksperımentter, ıdeıalar men batyl jańalyqtardyń alańyna aınaldy. Abay Gylym Fest festıvaline qatysýshylarymyzdyń arasynda bolashaq talantty ǵalymdar, mýzykanttar, memleket qaıratkerleri men muǵalimder bar ekenine senimdimin. Bilim, ǵylym jáne shyǵarmashylyq merekesi Atyraý ómiriniń turaqty bóligine aınalady dep senemiz», - dedi «Shevron» kompanıalarynyń áleýmettik ınvestısıalar jónindegi keńesshisi Leıla Aıtmuhanova.
Festıvál aıasynda «KazRobotics» federasıasynyń uıymdastyrýymen oqýshylar, stýdent jastar jáne pedagogtarǵa arnalǵan jarystar ótti.
Sonymen qatar, is-shara qonaqtary JasSpace Students STEAM Project Challenge jáne JASSPACE Educators STEAM Project Challenge baǵdarlamalary sheńberinde joǵary synyp oqýshylary men pedagogtardyń ınovasıalyq jobalarymen tanysa aldy. Festıvál aıasynda oqýshylar 40-tan astam jobany kelýshiler nazaryna usyndy, olardyń ishinde 20-dan astam joba JasSpace zerthanasy aıasynda jasaldy. Mysaly, trener Ásel Ondashovanyń jetekshiligimen «Hımıa» kýrsynyń oqýshylary tez jáne zıansyz ydyraıtyn qaıta paıdalanýǵa bolatyn bahıldardy usyndy.
ABAY GYLYM FEST-te kelýshiler bilim berý salasyndaǵy tájirıbeli sarapshylarmen jáne pikir kóshbasshylarymen kezdese aldy. Sonymen, «Dástúr» fılminiń rejıseri Qýanysh Beısek, qazaqstandyq Tık-tok juldyzy Ulan Úsenov, Pıfagor mektebiniń negizin qalaýshy jáne halyqaralyq matematıkterdiń jattyqtyrýshysy Asan Joldasov jáne taǵy basqa kórnekti spıkerler arnaıy dárister oqydy. Spıkerlerdiń tolyq baǵdarlamasyn festıváldiń veb-saıtynan kórýge bolady.
«Biz ABAY GYLYM FEST "JasSpace" jobasynyń jarqyn jáne qorytyndy is-sharasyna aınalǵanyna qýanyshtymyz. Jobamyzdyń aıasynda 2,5 myńnan astam jasóspirim 16 STEAM baǵdarlamasy aıasynda tegin kýrstarda oqyp shyqty, al 4,5 myńǵa jýyq oqýshy sheberlik sabaqtaryna, jazǵy qarqyndy kýrstarǵa, túrli baıqaýlarǵa qatysty. Biz jergilikti "JasSpace" komandasynyń kúsh - jigeri búkil Atyraý oblysynyń bilim berý salasyn jetildire túsýge úlken serpin beredi dep senemiz», - dedi Ortalyq Azıanyń Eýrazıa qory joba menejeri Saltanat Noǵaıbalanova.
Eske sala keteıik, «JasSpace» baǵdarlamasy Atyraý oblysynyń ákimdigi, «Shevron» kompanıasy, Atyraý oblysynyń bilim berý basqarmasy jáne Ortalyq Azıanyń Eýrazıa Qory arasynda qol qoıylǵan memorandým negizinde júzege asyrylýda. Bir jarym jyl ishinde JasSpace bazasynda 20 jergilikti qyzmetkerden turatyn komanda qurylyp, oqytý kýrstarynan ótti, 7-11 synyp oqýshylaryna arnalǵan 16 bilim berý baǵdarlamasy ázirlendi.
