Atyraý munai óńdeý zaýyty (AMÓZ) 2024 jylǵy óziniń óndiristik, qarjylyq jáne ekologiialyq qyzmetin qorytyndylady, – dep habarlaidy Dalanews.kz.
Kásiporyn tiimdilik pen turaqtylyqtyń joǵary deńgeiin kórsetýdi jalǵastyryp keledi. 2024 jyldyń tamyz-qarasha ailarynda otyn shyǵynynyń naqty kórsetkishteri 8,45-9,80%-dy quraap, normativtik deńgeiden edáýir tómendegen (12,47-14,5%). Bul 2023 jyldyń uqsas kezeńimen salystyrǵanda 1-4%-ǵa tómen.
Ónimdi óndirý.
Al suiytylǵan munai gazy (SMG) óndiris kólemi 2023 jylmen salystyrǵanda 6 322 tonnaǵa artyp, qarasha aiynda 23 080 tonnaǵa jetti. Aviakerosin óndiris 57%-ǵa ósip, 23 848 tonnany qurasa, munai óńdeý 10 aida 4 583 407 tonna shikizat qaita óńdeldi. Bul ótken jyldyń uqsas kezeńimen salystyrǵanda 57 336 tonnaǵa artyq.
Sol siiaqty AMÓZ operatsiialyq shyǵyndardy ońtailandyrýdy jalǵastyrýda. 2024 jylǵy 10 aida shyǵyndar 22%-ǵa tómendep, josparlanǵan 150,6 mlrd teńgeniń ornyna 117,4 mlrd teńgeni qurady. Al jóndeýge, materialdarǵa jáne ekologiialyq shyǵyndarǵa únemdeý sáikesinshe 59%, 20% jáne 75% quraǵan. Munai óńdeýge jumsalatyn úlestik shyǵyndar bir tonnaǵa 54 887 teńgege deiin tómendetildi (boljamnan 11 125 teńgege tómen).
AMÓZ óziniń ekologiialyq kórsetkishterin jaqsartýdy jalǵastyrýda. Kásiporyn lastaýshy zattardyń shyǵaryndylary 11,9%-ǵa (1 053 tonnaǵa) azaityp, aǵyndy sýlardyń tógindileri 68 tonnaǵa tómendetken. Bul qondyrǵylardy qaita qurýdyń nátijesinde múmkin bolǵan. Tazartý qurylystaryn jańǵyrtýdyń arqasynda qaldyqtar kólemi 39%-ǵa qysqarsa, parniktik gazdar shyǵaryndylary 20 509 tonnaǵa (1,5%) azaidy.
Kompaniia qyzmetkerlerdiń shetelde biliktiligin arttyrý úshin Halyqaralyq baǵdarlamalar ortalyǵymen yntymaqtastyq týraly memorandýmǵa qol qoiǵan bolatyn. Ǵylymi-tehnikalyq jobalardy iske asyrý úshin S.Ótebaev atyndaǵy Atyraý munai jáne gaz ýniversitetimen áriptestik iske qosyldy. Ujymnyń áleýmettik turaqtylyǵyn arttyrý úshin is-sharalar ótkizildi, áleýmettik turaqtylyq indeksi 9%-ǵa ósip, 68%-dy qurady.
Kásiporynda qyzmetkerler sany 2 525 adamǵa deiin ulǵaidy, onyń 43%-y 35 jasqa deiingi jastar. Eńbek jaǵdailaryn jaqsartý sharalarynyń arqasynda 2024 jyly kadrlardyń turaqtamaýy 2,31%-ǵa deiin tómendedi.
Josparly-aldyn alý jóndeý aiasynda 2024 jyly 15 tehnologiialyq qondyrǵy sátti jańartyldy. Jóndeý jumystary kesteden buryn aiaqtaldy, bul joǵary oktandy benzinder óndirisin tezirek qalpyna keltirýge múmkindik berdi.
PEP Solomon baǵdarlamasy aiasynda operatsiialyq tiimdilikti arttyrýǵa baǵyttalǵan 24 usynys iske asyryldy. Jańa tásilderdi engizýdiń ekonomikalyq áseri jylyna 1,5 mlrd teńgeden astamdy qurady.
AMÓZ ozyq tehnologiialardy engizýdi, qorshaǵan ortaǵa áserdi azaitýdy jáne turaqty óndiristi qamtamasyz etýdi jalǵastyra otyryp salanyń jetekshi kásiporyndarynyń biri retinde , óz mártebesin rastaidy.
