Úsh jylǵa sottalǵan shyny koroli «Turan Álem Bankiniń» burynǵy basshysy Erjan Tátishevti jeke Ábliazovtyń tapsyrysymen qasaqana jazym etkenin túrmede jatyp moiyndaǵan. Endi ol osy qylmysy úshin zań aldynda jaýap berýde, dep habarlaidy KTK arnasy.
Tarazda ótýiniń sebebi Toqmádi moiyndap otyrǵan qandy qylmys Jambyl oblysynyń aýmaǵynda bolǵan. Adam óltirý baby boiynsha aiyptalǵan Toqmadi isin oblystyq sot ótken aptada qaraýǵa alǵan. Áý basta aiyptalýshy sot protsesine tek onlain rejiminde qatysady delingen. Biraq olai bolmai shyqty.
Shyny koroli sot otyrysyna ózi kelgenimen, onyń ózi de advokaty da birden túsirilim jasaýǵa ruqsat etpedi. Sýdia ótinishti qanaǵattandyrdy. Al, jalpy Muratqan Toqmadi saý basyna saqina tilep aldy dese bolady.
Óitkeni ol «Turan Álem Bankiniń» burynǵy basshy Erjan Tátishevti qasaqana jazym etkenin 13 jyldan keiin jariia etip qoidy. Onyń nelikten mundai qadamǵa barǵany túsiniksizdeý.
«Ol Erjannyń kózin joiý kerektigi jóninde usynys jasady. Bul is ańshylyq kezinde baiqaýsyzda bolǵan oqiǵadai júzege asýy kerek edi. Ol bylai bolady. Qarýdy maǵan berip jatqan kezde men atyp jiberdim. Erjan sol jerde ólip ketti», – deidi aiyptalýshy Murathan Toqmadi.
Osylai dep sairaǵan kúdikti sol kezde qylmysqa Muhtar Ábliazovtyń tapsyrys bergenin jáne Tátishevti qasaqana óltirgenin jasyrǵan edi.
Al tergeýshilerge Tátishevtiń qaza bolý sebebin basqasha túsindirgen. Iaǵni, Otar jazyǵynda ań aýlap júrip mashina ishinde onyń qolyndaǵy qarýdan oq marqumnyń basyna abaisyzda atylyp ketti dep aqtalǵan edi.
Osy qylmysy úshin ol nebári bir jylǵa sottalyp, tipti raqymshylyqqa ilinip kóp uzamai túrmeden bosap shyqan. Al, qylmystyq is sol kúii jabylǵan bolatyn.
Belgili kásipkerdiń buǵan deiin úsh jylǵa sottalǵanyn aita keteiik. Ol ótken jyly birneshe aýyr baptar boiynsha aiyptalyp, biraq kinásin moiyndap, ári tergeýge kómek bergeni úshin jazasy edáýir jeńildegen. Al, bul joly shyny koroli ońai qutylmaityn tárizdi. Adam óltirý baby boiynsha aiyptalǵan Toqmadi tipti ómir boiyna túrmege jabylýy múmkin.
