Qazaq ádebietiniń kórnekti ókili, akademik Sábit Muqanov týraly el ishinde qyzyqty estelikter az emes. Sonyń biri – qarapaiym aýyl qazaǵynyń áigili jazýshynyń shyǵarmasynan qate taýyp, oǵan arnaiy hat joldaýy, dep habarlaidy dalanews.kz.
Bul oqiǵa Sábit Muqanovtyń «Syrdariia» romany jaryq kórgennen keiin bolǵan eken. Kóp uzamai jazýshyǵa aýyldaǵy bir aqsaqaldan hat keledi. Hat iesi ózi hat tanymaitynyn, kitapty balasyna bastan-aiaq oqytyp tyńdaǵanyn jazady. Sonymen qatar shyǵarmany úlken qyzyǵýshylyqpen qabyldaǵanyn aityp, jazýshynyń halyq turmysyn jetik biletinine rizashylyǵyn bildiredi.
Alaida aqsaqaldyń kókeiinde bir suraq mazalap júrgenin de jasyrmaidy.
– Qaraǵym, Sábit! Sen eski ómirdi jaqsy biletin adamsyń ǵoi. Biraq kitabyńdaǵy bir jerine túsinbei otyrmyn, – dep bastaidy ol óz hatyn.
Másele shyǵarmadaǵy kúrishshi Syrbaidyń túiesine qatysty bolyp shyǵady. Romanda keiipkerdiń jalǵyz túiesinen eki býyrshyn bar ekeni aitylady. Keiin olardyń birin maidanǵa kómek retinde satyp jiberedi. Al soǵystan uly jaralanyp oralǵanda, qýanyshqa orai qalǵan býyrshyn soiylady.
Osy tusqa toqtalǵan aýyl qariiasy jazýshyǵa:
– Osy eki býyrshynnyń bireýi saǵan qaidan keldi? – dep saýal qoiady.
Sebebi qazaqy tanymda túie egiz botalamaidy degen túsinik bar. Aqsaqal da osyny meńzep, shyǵarmanyń shynaiylyǵyna kúmán keltirgen.
Bul hatty oqyǵan Sábit Muqanov qatty yńǵaisyzdanǵan desedi. Óitkeni qarapaiym aýyl adamy baiqap qalǵan detalǵa ózi mán bermei ketkenin túsinedi. Keiin jazýshy álgi qariiadan keshirim suraǵany aitylady.
