قازاق ەدەبيەتٸنٸڭ كٶرنەكتٸ ٶكٸلٸ, اكادەميك سەبيت مۇقانوۆ تۋرالى ەل ٸشٸندە قىزىقتى ەستەلٸكتەر از ەمەس. سونىڭ بٸرٸ – قاراپايىم اۋىل قازاعىنىڭ ەيگٸلٸ جازۋشىنىڭ شىعارماسىنان قاتە تاۋىپ, وعان ارنايى حات جولداۋى, دەپ حابارلايدى dalanews.kz.
بۇل وقيعا سەبيت مۇقانوۆتىڭ «سىردارييا» رومانى جارىق كٶرگەننەن كەيٸن بولعان ەكەن. كٶپ ۇزاماي جازۋشىعا اۋىلداعى بٸر اقساقالدان حات كەلەدٸ. حات يەسٸ ٶزٸ حات تانىمايتىنىن, كٸتاپتى بالاسىنا باستان-اياق وقىتىپ تىڭداعانىن جازادى. سونىمەن قاتار شىعارمانى ٷلكەن قىزىعۋشىلىقپەن قابىلداعانىن ايتىپ, جازۋشىنىڭ حالىق تۇرمىسىن جەتٸك بٸلەتٸنٸنە ريزاشىلىعىن بٸلدٸرەدٸ.
الايدا اقساقالدىڭ كٶكەيٸندە بٸر سۇراق مازالاپ جٷرگەنٸن دە جاسىرمايدى.
– قاراعىم, سەبيت! سەن ەسكٸ ٶمٸردٸ جاقسى بٸلەتٸن ادامسىڭ عوي. بٸراق كٸتابىڭداعى بٸر جەرٸنە تٷسٸنبەي وتىرمىن, – دەپ باستايدى ول ٶز حاتىن.
مەسەلە شىعارماداعى كٷرٸششٸ سىربايدىڭ تٷيەسٸنە قاتىستى بولىپ شىعادى. روماندا كەيٸپكەردٸڭ جالعىز تٷيەسٸنەن ەكٸ بۋىرشىن بار ەكەنٸ ايتىلادى. كەيٸن ولاردىڭ بٸرٸن مايدانعا كٶمەك رەتٸندە ساتىپ جٸبەرەدٸ. ال سوعىستان ۇلى جارالانىپ ورالعاندا, قۋانىشقا وراي قالعان بۋىرشىن سويىلادى.
وسى تۇسقا توقتالعان اۋىل قاريياسى جازۋشىعا:
– وسى ەكٸ بۋىرشىننىڭ بٸرەۋٸ ساعان قايدان كەلدٸ? – دەپ ساۋال قويادى.
سەبەبٸ قازاقى تانىمدا تٷيە ەگٸز بوتالامايدى دەگەن تٷسٸنٸك بار. اقساقال دا وسىنى مەڭزەپ, شىعارمانىڭ شىنايىلىعىنا كٷمەن كەلتٸرگەن.
بۇل حاتتى وقىعان سەبيت مۇقانوۆ قاتتى ىڭعايسىزدانعان دەسەدٸ. ٶيتكەنٸ قاراپايىم اۋىل ادامى بايقاپ قالعان دەتالعا ٶزٸ مەن بەرمەي كەتكەنٸن تٷسٸنەدٸ. كەيٸن جازۋشى ەلگٸ قارييادان كەشٸرٸم سۇراعانى ايتىلادى.
