"Atameken" ulttyq kásipkerler palatasy Raıymbek Batalovtyń otstavkasy týraly aqparatty joqqa shyǵardy, dep habarlaıdy Dalanews.kz.
Palata málimetinshe, keıbir derekkózderde taratylyp jatqan Raıymbek Batalovtyń «Atameken» Ulttyq kásipkerler palatasy Tóralqasynyń Tóraǵasy qyzmetinen bosatylatyny týraly aqparat shyndyqqa janaspaıdy.
«Qazaqstan Respýblıkasynyń Ulttyq kásipkerler palatasy týraly» Qazaqstan Respýblıkasy Zańynyń 21-baby 2-tarmaǵynyń 1) tarmaqshasyna, sondaı-aq «Atameken» UKP Jarǵysynyń 16.4-tarmaǵynyń 1) tarmaqshasyna sáıkes, Tóralqa Tóraǵasy tek Ulttyq kásipkerler palatasy Seziniń sheshimimen ǵana saılanady jáne qyzmetinen bosatylady.
"Osy máselege qatysty ózge de málimdemeler men jarıalanymdar shyndyqqa janaspaıtyny jáne quqyqtyq negizi joq ekendigin atap ótemiz. Tekserilmegen jáne jalǵan aqparatty taratpaýǵa shaqyramyz", - deıdi palata ókilderi.
