Belgili akter Baqtiiar Qoja qoǵamda beleń alǵan ajyrasý máselesine bailanysty alańdaýshylyq tanytty, dep habarlaidy Dalanews.kz.
Óner iesi "Bilim-Qazyna" Youtube arnasyna bergen suhbatynda buǵan sebep bolatyn birneshe problemany atap ótti. Aitýynsha, sońǵy kezde balasyn áielinen qyzǵanatyn eneler kóbeigen. Sonyń saldarynan otbasynyń oirany shyǵyp, jastar eki jaqqa ketýde.
"Bul oidy resmi statistika da qýattaidy. Sarapshylardyń sózinshe, ajyrasýǵa negizgi sebep – 60 paiyz jaǵdaidy týystarynyń aralasýynan bolady eken. Ajyrasýdyń taǵy bir sebebi – jastardyń ózara sóilese almaýy, birin-biri túsinbeýi. Qazirgi telefonǵa telmirgen jastarda bir-birin tyńdaý, oi bólisý sekildi daǵdylar qalyp barady. Qyzǵanysh, keshire almaý, tákapparlyq sekildi faktorlar da ajyrasýdyń sebebi bolyp jatyr. Munda durys tárbie bere almaǵan ata-analardyń da qateligi bar", - deidi Baqtiiar Qoja.
Sonymen qatar akter kúni keshe jaryqqa shyqqan statistikany da negizge aldy.
"Resmi statistikaǵa súiensek, Qazaqstan ajyrasý sany boiynsha álemde ekinshi orynda tur. Demek, otbasyn qurǵan árbir úshinshi, tipti ekinshi nekeniń sońy sátsiz aiaqtalyp jatyr. Sarapshylar eldegi ajyrasýdyń negizgi sebepteri jas otbasynyń isine týystarynyń aralasýy (61%), moraldyq shekteýlerdiń bolmaýy (41%), ońai ajyrasý protsesi (25%)", - dep atap ótti ol.
