Elordanyń ekologiialyq kún tártibindegi ózekti máselelerdiń biri –sanitarlyq tazalyqty kúsheitý jáne kommýnaldyq qyzmetterdiń ashyqtyǵy – osy is-sharanyń basty arqaýyna ainaldy. Aýqymdy sharaǵa BAQ ókilderimen qatar, ekologtar, blogerler, qoǵam belsendileri qatysty. Qatysýshylarǵa qalanyń sanitarlyq deńgeiin saqtaýǵa kómektesetin zamanaýi tehnika tanystyrylyp, kásiporynnyń óndiristik nysany boiynsha ekskýrsiia uiymdastyryldy. Sondai-aq salalyq mamandar shara qonaqtarymen pikir almasty.
Astana – qarqyndy damyp jatqan zamanaýi megapolis. Munda kún saiyn aýqymdy qurylys jobalary júzege asyrylady, infraqurylym jańǵyrtylyp, kólik sany artýda. Bul – qorshaǵan ortaǵa túsetin antropogendik júktemeniń artýyna ákelip otyr. Qalanyń tazalyǵy tek kommýnaldyq qyzmetterdiń jumysyna ǵana emes, sonymen birge árbir azamattyń ekologiialyq sanasy men jaýapkershiligine tikelei bailanysty.
Ásirese, qurylys alańdary, ónerkásiptik nysandar men júktemesi joǵary magistraldar mańynda jaǵdai kúrdeli.
Bir kún kóshe tazalanbasa ne bolady?
Baspasóz týry aiasynda «Astana Tazalyq» JShS bas direktory Zamir Saǵynov elordanyń tazalyq mádenietin ashyq kórsetý maqsatynda tájiribe ótkizilgenin málimdedi:
– «Bloger Batyrjannyń ótinishi boiynsha qalanyń ekologiialyq ahýalyn naqty kórsetý úshin shaǵyn, biraq mańyzdy tájiribe júrgizdik. Qaladaǵy basty kóshelerdiń biri – Kerei-Jánibek kóshesinen Máńgilik el dańǵylyndaǵy «Máńgilik el» saltanat qaqpasyna deiingi aralyq bir kún boiy ádeii tazalanbady», – dedi ol. Jinalǵan derekter qaladaǵy tazalyq mádenietiniń naqty kórinisine ainalyp, qoǵamda oryndy alańdaýshylyq týdyrdy.
Temeki tuqyly – 6 112 dana
Aliýminii bankalar – 658 dana
Banan qabyqtary – 78 dana
Qaǵaz qaldyqtary – 343 dana
Balmuzdaq oramalary – 436 dana.
Bul kórsetkish turmystyq lastanýdyń aýqymyn ǵana emes, sonymen qatar qalalyq ómir saltynda qalyptasyp qalǵan mádeni daǵdylardy da aiqyn ańǵartady. Ásirese, temeki tuqyldarynyń basym bolýy – erekshe alańdatarlyq jait. Olar qala kelbetine keri áser etip qana qoimai, turǵyndardyń densaýlyǵyna da tikelei qaýip tóndiretin, kóshedegi eń keń taralǵan qoqys túrine ainalyp otyr.
Zamir Saǵynovtyń aitýynsha, bul tájiribe turǵyndardyń óz qalasyna degen kózqarasy ózgermeiinshe, kommýnaldyq qyzmettiń júieli jumysy da uzaqmerzimdi nátijege qol jetkizbeitininiń dáleli.
Baspasóz týry aiasynda «Astana Tazalyq» pen Kásibi tehnologiialar kolledji arasynda ózara yntymaqtastyq týraly memorandýmǵa qol qoiyldy. Bul qujat – sanitarlyq qyzmet pen qalany abattandyrý salasyna jańa mamandar daiarlaýǵa baǵyttalǵan mańyzdy qadam. Alǵash ret kolledj stýdentterine Kásiporyn bazasynda aqyly óndiristik tájiribeden ótý múmkindigi usynyldy. Aldaǵy ýaqytta bul baǵdarlama keńeitilip, osyndai múmkindik basqa da oqý oryndarynyń stýdentterine berilmek.
Qatysýshylar sondai-aq kompaniianyń tsifrlyq baqylaý júiesimen tanysty. Tehnikalyq baqylaý bóliminiń basshysy Dastan Musabekovtiń aitýynsha, barlyq tehnikalarǵa ornatylǵan jańa býyn GPS-navigatsiialar arnaiy mashinalardyń qozǵalysyn da, júrgizýshilerdiń tártibin de naqty ýaqytta baqylaýǵa múmkindik beredi.
– Qazirgi júie tehnikanyń qai jerde ekenin ǵana emes, júrgizýshiniń marshrýttan aýytqýyn, uzaq turyp qalýyn nemese tipti uiyqtap ketkenin de tirkeidi. Mundai tehnologiialar tártip pen qaýipsizdikti arttyryp, jumystyń sapasyn da jaqsartady, – dedi D. Musabekov.
