Saiabaqtyń jalpy alańy men saiabaq aimaǵy 87 gektardy quraidy. Qazir onyń ainalasyna kóptegen turǵyn úiler salynýda. Bolashaqta munda astanalyqtar ǵylymi-zertteý, aǵartý jumystarymen ainalystyn múmkindikke ie bolady. Botanikalyq baq týristerdi de tartatyn orynǵa ainalmaqshy.
– Osyndai biregei Botanikalyq saiabaqty jasaýdyń ideiasy Memleket basshysyna tiesili. Eń bastysy, bul jer qala turǵyndary men qonaqtary úshin jaily jáne sporttyq alańdarmen de jabdyqtalýy tiis. Bul keńistik barlyq turǵyndarǵa qolaily bolýy kerek. Osynda kelýshilerdiń ózderin óte jaily, qaýipsiz sezinýi mańyzdy. Mindetti túrde beinekameralar, statsionarlyq dárethanalar, sporttyq serýendeitin jalǵyz aiaq joldar salynýy kerek, – dedi qala ákimi.
Botanikalyq saiabaqta 2 balalar oiyn alańy, 20 trenajer, 2 fýtbol alańy, 4 tennis alańy, 4 voleibol jáne 2 basketbol alańy, 14,2 shaqyrymdyq velojol, 11,8 júgirý joly, demalysqa arnalǵan 4 alań, 8 úlken jaryq jáne 18 kishi aerodinamikalyq fontan, odan basqa munda WI-FI úshin oryndyqtar ornatylatyn bolady.
Mundaǵy aǵashtardyń jalpy sany 95 myńdy quraidy. Búginge deiin saiabaqta 2 jylyjai, 45 myń sharshy metr alańdy quraityn jasandy sý qoimasy, jaiaý júrginshiler kópiri, velosiped jáne júgirý joldary salynǵan. Sonymen qatar shildede Abý-Dabi plaza kesheni men Botanikalyq saiabaqpen shektesetin Aqmeshit jáne Túrkistan kósheleri aralyǵynda ornalasqan Lineinyi saiabaǵynyń da birinshi kezektegi qurylysy aiaqtalyp qalǵan. Qazir saiabaqtyń aýmaǵyna aǵash otyrǵyzý jumystary júrgizilýde. Soynmen qatar fontan qurylǵysy ornatylǵan.
Lineinyi saiabaǵynda 2 qurǵaq fontannyń qurylysy, eki balalar alańy, 2,2 shaqyrymdyq velosiped joly men skeit alańyn salý josparlanýda.
Áset Isekeshev birneshe turǵyn úilerdiń janynda ornalasqan Lineinyi saiabaǵynyń ornalasý mańyzdylyǵyn da atap ótti. Ákimniń aitýynsha, saiabaq otbasylyq demalysqa arnalǵan tanymal orynǵa ainalady.
Jalpy 2018 jyly Astana qalasy boiynsha 386 myń aǵash otyrǵyzyldy, onyń 208 myńy elordanyń «Jasyl beldeýine», taǵy 178 myńy saiabaqtar men gúlzarlarǵa otyrǵyzylǵan. Ótken jyly otyrǵyzylǵan aǵashtar sany 312 myńdy qurady.
