ساياباقتىڭ جالپى الاڭى مەن ساياباق ايماعى 87 گەكتاردى قۇرايدى. ءقازىر ونىڭ اينالاسىنا كوپتەگەن تۇرعىن ۇيلەر سالىنۋدا. بولاشاقتا مۇندا استانالىقتار عىلىمي-زەرتتەۋ، اعارتۋ جۇمىستارىمەن اينالىستىن مۇمكىندىككە يە بولادى. بوتانيكالىق ب ا ق تۋريستەردى دە تارتاتىن ورىنعا اينالماقشى.
– وسىنداي بىرەگەي بوتانيكالىق ساياباقتى جاساۋدىڭ يدەياسى مەملەكەت باسشىسىنا تيەسىلى. ەڭ باستىسى، بۇل جەر قالا تۇرعىندارى مەن قوناقتارى ءۇشىن جايلى جانە سپورتتىق الاڭدارمەن دە جابدىقتالۋى ءتيىس. بۇل كەڭىستىك بارلىق تۇرعىندارعا قولايلى بولۋى كەرەك. وسىندا كەلۋشىلەردىڭ وزدەرىن وتە جايلى، ءقاۋىپسىز سەزىنۋى ماڭىزدى. مىندەتتى تۇردە بەينەكامەرالار، ستاسيونارلىق دارەتحانالار، سپورتتىق سەرۋەندەيتىن جالعىز اياق جولدار سالىنۋى كەرەك، – دەدى قالا اكىمى.
بوتانيكالىق ساياباقتا 2 بالالار ويىن الاڭى، 20 ترەناجەر، 2 فۋتبول الاڭى، 4 تەننيس الاڭى، 4 ۆولەيبول جانە 2 باسكەتبول الاڭى، 14،2 شاقىرىمدىق ۆەلوجول، 11،8 جۇگىرۋ جولى، دەمالىسقا ارنالعان 4 الاڭ، 8 ۇلكەن جارىق جانە 18 كىشى اەروديناميكالىق فونتان، ودان باسقا مۇندا WI-FI ءۇشىن ورىندىقتار ورناتىلاتىن بولادى.
مۇنداعى اعاشتاردىڭ جالپى سانى 95 مىڭدى قۇرايدى. بۇگىنگە دەيىن ساياباقتا 2 جىلىجاي، 45 مىڭ شارشى مەتر الاڭدى قۇرايتىن جاساندى سۋ قويماسى، جاياۋ جۇرگىنشىلەر كوپىرى، ۆەلوسيپەد جانە جۇگىرۋ جولدارى سالىنعان. سونىمەن قاتار شىلدەدە ابۋ-دابي پلازا كەشەنى مەن بوتانيكالىق ساياباقپەن شەكتەسەتىن اقمەشىت جانە تۇركىستان كوشەلەرى ارالىعىندا ورنالاسقان لينەينىي ساياباعىنىڭ دا ءبىرىنشى كەزەكتەگى قۇرىلىسى اياقتالىپ قالعان. ءقازىر ساياباقتىڭ اۋماعىنا اعاش وتىرعىزۋ جۇمىستارى جۇرگىزىلۋدە. سوىنمەن قاتار فونتان قۇرىلعىسى ورناتىلعان.
لينەينىي ساياباعىندا 2 قۇرعاق فونتاننىڭ قۇرىلىسى، ەكى بالالار الاڭى، 2،2 شاقىرىمدىق ۆەلوسيپەد جولى مەن سكەيت الاڭىن سالۋ جوسپارلانۋدا.
اسەت يسەكەشيەۆ بىرنەشە تۇرعىن ۇيلەردىڭ جانىندا ورنالاسقان لينەينىي ساياباعىنىڭ ورنالاسۋ ماڭىزدىلىعىن دا اتاپ ءوتتى. اكىمنىڭ ايتۋىنشا، ساياباق وتباسىلىق دەمالىسقا ارنالعان تانىمال ورىنعا اينالادى.
جالپى 2018 جىلى استانا قالاسى بويىنشا 386 مىڭ اعاش وتىرعىزىلدى، ونىڭ 208 مىڭى ەلوردانىڭ «جاسىل بەلدەۋىنە»، تاعى 178 مىڭى ساياباقتار مەن گۇلزارلارعا وتىرعىزىلعان. وتكەن جىلى وتىرعىزىلعان اعاشتار سانى 312 مىڭدى قۇرادى.
