Astana ákimi Jeńis Qasymbek qaladaǵy qylmystyq jaǵdaidy basqa shetel megapolisterimen salystyrý orynsyz ekenin málimdedi, dep habarlaidy Dalanews.kz.
Qasymbek bul pikirin máslihat depýtaty Talǵat Erǵalievtiń Saryarqa aýdanyndaǵy kriminaldyq ahýal týraly synyna jaýap retinde aitty. Ákimniń sózinshe, elordada jyl saiyn shamamen 20 jańa politsiia beketi ashylady, ár aýdanǵa arnalǵan is-qimyl jospary IID-men kelisilip, tolyq júzege asyrylady. Biyl jeltoqsan aiynda qaladaǵy qylmys deńgeii 27,6%-ǵa tómendegen.
“Qylmys deńgeiiniń tómendeýi Astananyń Qazaqstandaǵy reitingin jaqsartyp qana qoimai, álemdik megapolister arasyndaǵy pozitsiiasyna da oń áserin tigizedi. Sondyqtan Astanany Karakas nemese basqa qalalarmen salystyrý orynsyz. Biz bárimiz osy másele úshin jaýaptymyz. Syn aitqym kelmeidi, biraq qala basshysy retinde sizderden osyny eskerýdi suraimyn”, – dedi Qasymbek.
Saryarqa aýdanyndaǵy damý máselelerine qatysty ákim resýrstardyń bólinýi halyq sanyna sáikes júzege asyrylatynyn jetkizdi. Qazirgi ýaqytta Kóktal shaǵyn aýdanynda jańa perinataldyq ortalyq salynyp jatyr, úshinshi kópsalaly aýrýhananyń qurylysyna daiyndyq júrgizilýde, sondai-aq basseini bar Oqýshylar saraiy men jańa mektepter boi kóterýde. Agroqalalarda da bilim berý nysandary salynyp jatyr.
Qasymbektiń aitýynsha, Saryarqa – elordanyń tarihi ortalyǵy, munda eski temirjol vokzaly siiaqty mańyzdy infraqurylym bar. Depýtattyń saýalyna bailanysty qala ákimdigi aýdannyń qajettilikterin qosymsha zerttep, qajet bolsa keler jyldyń biýdjeti aiasynda qosymsha qarjy bóletinin málimdedi.
