QMA Túrkistan oblysy boıynsha departamenti medısınalyq jabdyqtardy satyp alý kezinde búdjet qarajatyn jymqyrý deregi boıynsha tergeý júrgizip jatyr, dep habarlaıdy Dalanews.kz.

"Qazyǵurt aýdandyq ortalyq aýrýhanasy" MKK burynǵy bas dárigeri medısınalyq gazben jabdyqtaý júıesine arnalǵan qurylǵylardy satyp alý kezinde olardy jasandy túrde birneshe bólikke bólip, keıin kóptegen kelisimshart jasaý arqyly satyp alýdy uıymdastyrǵan.

Shemany júzege asyrý úshin ol medısınalyq jabdyqtardy jetkizý salasynda tájirıbesi bar tanysyn tartqan. Ol óziniń, týystary men tanystarynyń atyna tirkelgen komersıalyq uıymdardy paıdalanǵan.

Osy kompanıalardyń atynan ádeıi asyra kórsetilgen komersıalyq usynystar daıyndalǵan. Sonymen qatar, jabdyqty is júzinde basqa kompanıa jetkizgenimen, qabyldaý aktileri men kelisimsharttar baqylaýyndaǵy fırmalar arqyly rásimdelgen. Aýrýhanadan osy kompanıalardyń esepshottaryna qarjy túskennen keıin kúdiktiler qarajatty qolma-qol aqshaǵa aınaldyryp, ózara bólgen. Memleketke keltirilgen jalpy shyǵyn 115 mln teńge bolady.

Qylmystyq jolmen alynǵan tabysqa kúdikti elordadan eki bólmeli páter satyp alǵan, sot sanksıasymen bul múlikke tyıym salyndy.

Burynǵy bas dárigerge qatysty bultartpaý sharasy retinde kepil qoldanyldy, al onyń sybaılasy úı qamaqta otyr.