Astanadaǵy turǵyn úi keshenderiniń birinde túnde bolǵan órt saldarynan balalardyń qaza tabýyna bailanysty qylmystyq is qozǵaldy. Bul týraly qalalyq politsiia departamenti habarlady, dep habarlaidy Dalanews.kz.
Vedomstvo ókilderiniń málimetinshe, bolǵan oqiǵanyń barlyq mán-jaiyn anyqtaýǵa baǵyttalǵan jedel-tergeý sharalary kesheni júrgizilip jatyr. Tergeý nátijesi boiynsha tiisti quqyqtyq baǵa berilmek.
Oqiǵa ornynda politsiia qyzmetkerleri aýmaqty qorshaýǵa alyp, arnaiy tehnikanyń kedergisiz ótýin qamtamasyz etý úshin turǵyn úi kesheniniń aýlasyn turaqta turǵan kólikterden bosatqan.
Keiin politsiia departamenti oqiǵa ornyna alǵashqylardyń biri bolyp jetken qyzmetkerlerdiń beinetirkegishterinen alynǵan jazbany jariialady. Kadrlarda olardyń birden turǵyndardy evakýatsiialaýǵa kiriskeni kórinedi.
Astana qalalyq tótenshe jaǵdailar departamenti túngi órtke qatysty qosymsha málimet berdi. Qutqarýshylardyń aitýynsha, turǵyn úi kesheniniń aýlasyna kireberis temir qaqpamen jabyq bolǵan, al aýla kóliktermen tolyp turǵan.
Astana qalasy TJD bastyǵynyń orynbasary Ómirjan Túkúshevtiń aitýynsha, órt sóndirý bólimsheleri kelgen kezde páter tolyq aýmaǵy boiynsha ashyq jalynǵa oranǵan. Páter esigi jabyq bolǵandyqtan, qutqarýshylar ony arnaiy quraldardyń kómegimen ashýǵa májbúr bolǵan.
Onyń sózinshe, órt dabyly men habarlaý júiesi iske qosylyp, liftiler birinshi qabatqa túsken. Sonymen qatar, aýlaǵa kireberis temir qaqpamen jabyq bolyp, aýla avtokóliktermen tolyp turǵanyna qaramastan, órttiń kórshi páterlerge taralýyna jol berilmegen.
Eske salaiyq, 12 sáýirge qaraǵan túni Astanadaǵy Túrkistan kóshesinde ornalasqan 21 qabatty turǵyn úidiń 15-qabatyndaǵy páterden órt shyqqan. Oqiǵa ornynda úsh balanyń denesi tabyldy. Órt sóndirýshiler bir áieldi qutqaryp, ony kúiik jaraqattarymen aýrýhanaǵa jetkizdi. Joǵarǵy qabattardan 20 adam evakýatsiialanyp, taǵy shamamen 40 turǵyn ǵimarattan óz betinshe shyqqan.
