2025 jyly 11 aqpanda Astanada 14 jastaǵy jasóspirim lıftide 5 jasar balaǵa pyshaqpen shabýyl jasady. Oqıǵany tergeý kezinde kámelet jasyna tolmaǵan jasóspirim psıhonevrologıalyq dıspanserde esepte turǵany anyqtalǵan.
Astana Polısıa departamenti bastyǵynyń orynbasary Qýanysh Orynbetovtiń aıtýynsha, balaǵa jasalǵan shabýyl boıynsha qylmystyq is qozǵalǵan.
Resmı málimetke súıensek, Qylmystyq kodekstiń 293-babynyń 3-bóligi «Densaýlyqqa zıan keltirý úshin arnaıy laıyqtalǵan basqa da zattardy qoldanyp nemese qoldanýǵa tyrysyp jasalǵan, sol sıaqty qylmystyq top jasaǵan buzaqylyq» boıynsha sotaldy tergep-tekserý bastalǵan.
Bul baptyń sanksıasy bes jyldan jeti jylǵa deıingi merzimge bas bostandyǵynan aıyrý jazasyn qarastyrady.
Al qalalyq densaýlyq saqtaý basqarmasynyń málimetinshe, zardap shekken bala bes jasta. Dárigerler alǵashynda onyń jalpy jaǵdaıyn aýyr dep baǵalady. Al otadan keıin balanyń jaǵdaıy turaqty ekeni aıtyldy.
