Astanada Darıǵa Nazarbaevanyń burynǵy záýlim úıi tolyqtaı súrilip, onyń ornyna jańa turǵyn úı kesheni boı kótermek, dep habarlaıdy Dalanews.kz.

Sý jaǵasynda ornalasqan bul úı kezinde jaıaý júrginshiler úshin jabyq aýmaq bolǵan. Serýendeýge shyqqan adamdar sol aýmaqty aınalyp ótýge májbúr edi. Endi ǵımarattyń buzylýymen jaǵalaý aımaǵy tolyq ashylyp, qala turǵyndaryna qoljetimdi boldy.

Aldyn ala málimetterge sáıkes, jańa turǵyn úı kesheni «Swiss Collection» dep atalýy múmkin. Jelide taraǵan beınerolıkte ol premıým sanattaǵy elıtalyq joba retinde tanystyrylǵan. Sarapshylar páter quny júzdegen mıllıon teńgege jetýi yqtımal ekenin aıtady.

Qazirgi ýaqytta qurylys alańynda jumystar bastalǵan. Jobanyń sáýlettik erekshelikteri men qashan aıaqtalatyny týraly naqty aqparat áli jarıalanǵan joq. Degenmen, burynǵy ǵımarattyń súrilip, jaǵalaýdyń halyqqa ashylýy astanalyqtar úshin jaǵymdy jańalyqqa aınaldy.