Elordada bolǵan avtobýs apatynan 8 jasar Alýa aýyr jaraqat alyp, qos aiaǵynan aiyryldy. Jýrnalister osyǵan bailanysty qala ákimi Jeńis Qasymbekke birneshe suraq qoidy, dep habarlaidy Dalanews.kz.
– Bul qaiǵyly jaǵdaiǵa kim jaýapty?
– №1 avtoparkke qarasty avtobýstardyń tehnikalyq jai-kúii qandai?
– Jolaýshylar qaýipsizdigine taǵy qandai qaýipter bar?
Ákim bul máselede asyǵystyqqa jol bermei, tergeý qorytyndysyn kútýdi surady.
"Kinálini anyqtaý — tergeý organdarynyń quzyrynda. Meniń bilýimshe, avtobýs júrgizýshisi – tájiribeli maman, kóp jyldan beri osy salada jumys istep keledi. Qazir ol tergelip jatyr. Sondyqtan naqty sheshim shyqpaiynsha, qorytyndy aitý erte", – dedi Jeńis Qasymbek.
Ákimniń aitýynsha, qazirgi tańda qala avtoparki 700-ge jýyq jańa avtobýspen tolyqqan. Bul avtobýstar – álemniń túrli elderinde qoldanylatyn, sapaly tehnika.
"Apattyń aldyn alýǵa tyrysqanymyzben, tolyq qaýipsizdikti qamtamasyz etý múmkin emes. Qoǵamdyq kólik qozǵalysy – óz ishinde táýekeli bar sala. Mundai jaǵdailar buǵan deiin de bolǵan. Biraq tergeý aiaqtalǵan soń kináliler zań aiasynda jazalanady", – dedi ákim.
Alýa men otbasyna kórsetilip jatqan kómek
Jýrnalister apattan zardap shekken Alýa men onyń anasyna qandai kómek kórsetilip jatqanyn da surady.
"Otbasyna ákim orynbasary birneshe ret bardy. Keshe de, búgin de jaǵdaiymen tanysyp qaitty. Saqtandyrý arqyly shamamen 20 mln teńge bólinedi. Ákimdik alǵashqy 10 mln teńgeni berip, taǵy 10 mln berýdi josparlap otyr. Sonymen qatar, bul otbasyǵa páter de beriledi. Muny resmi túrde málimdeimin", – dedi Jeńis Qasymbek.
Aita keteiik, №1 avtopark te málimdeme jasap, apatqa ushyraǵan avtobýs júrgizýshisiniń tájiribeli ári senimdi maman ekenin, buǵan deiin oǵan eshqandai shaǵym bolmaǵanyn jetkizdi.
Apatqa qatysty beinejazbany Alýanyń týystary ashqan @help.aluabeken paraqshasynan kórýge bolady.
