Qazaqstan Parlamenti Senatynyń tóraǵasy Máýlen Áshimbaev pen Ózbekstan Olii Májilisi Senatynyń tóraǵasy Tanzila Narbaeva Astanada ótken qazaq-ózbek ǵylymi-shyǵarmashyl ziialylarynyń alǵashqy forýmynda sóz sóiledi. Is-shara T.Narbaevanyń Qazaqstanǵa resmi sapary aiasynda uiymdastyryldy, dep habarlaidy Dalanews.kz.
Forým barysynda eki eldegi ǵylymi jáne mádeni ortanyń ókilderi mádeni-gýmanitarlyq yntymaqtastyqty nyǵaitýǵa, halyqtyq diplomatiiany damytýǵa jáne dástúr sabaqtastyǵyn saqtaýǵa qatysty mańyzdy máselelerdi talqylady. Sondai-aq olar birqatar baǵytta ózara bailanysty odan ári arttyrý jolyndaǵy basym mindetterdi belgiledi.
Máýlen Áshimbaev óz sózinde Qazaqstan men Ózbekstan ziialylarynyń alǵashqy forýmy Memleket basshysynyń tikelei tapsyrmasymen ótkizilip jatqanyn aitty. Prezident eki eldiń ǵylymi-shyǵarmashyl ziialylarynyń ózara bailanysyna únemi basa mán berip keledi. Osy oraida bul alań baýyrlas halyqtardyń gýmanitarlyq yntymaqtastyǵyn teredetýge jol ashatyn mańyzdy bastama ekeni anyq.
«Sońǵy jyldarda Qazaqstan Prezidenti Qasym-Jomart Kemeluly Toqaev pen Ózbekstan Prezidenti Shavkat Miromonovich Mirzieevtiń basshylyǵymen qazaq-ózbek qarym-qatynasy buryn-sońdy bolmaǵan joǵary deńgeige kóterildi. Bul rette mádeni-gýmanitarlyq saladaǵy yntymaqtastyq basym baǵyttardyń biri ekenin atap ótken jón. Shyn máninde, mádeniet, óner, bilim degenimiz – eshqandai saiasat salqyny buza almaityn myzǵymas kópirler. Olar qashanda ortaq tarihqa, ózara qurmetke jáne qundylyqtarǵa taban tireidi. Ǵylymi jáne shyǵarmashyl ortanyń búgingi kezdesýi aldaǵy ýaqytta tyń ideialarmen, mańyzdy oilarmen jáne jańa josparlarmen almasatyn dástúrli alańǵa ainalady dep senemiz. Osyndai igilikti is arqyly biz bir-birimizdiń únimizge qulaq asyp, ortaq jarqyn bolashaq jolynda mańyzdy qadam jasaimyz», – dedi Senat Spikeri.
Sonymen qatar Máýlen Áshimbaev qazirgi jaǵdaida Qazaqstan men Ózbekstan halyqtary arasyndaǵy dostyqty qalyptastyryp, nyǵaitatyn adami bailanystar da erekshe mánge ie ekenin atap ótti. Bul rette jastar airyqsha ról atqaratyny anyq. Sondyqtan bilim, ǵylym, mádeniet salalaryndaǵy ortaq baǵdarlamalardy keńeitý, birlesken zertteýler júrgizip, tájiribe almasý, kreativti jáne IT-jobalardy iske asyrý asa mańyzdy.
«Bizdiń elderimiz ǵylymǵa úlken kóńil bólip otyr. Bul – qýantarlyq jait. Byltyr Astanada ótken Ortalyq Aziia tarihshylarynyń forýmy ortaq tarihymyzdy kásibi turǵydan qaita qaraýdyń qanshalyqty qajet ekenin aiqyn kórsetip berdi. Osyǵan bailanysty aldaǵy ýaqytta birlesken zertteýlerdi, muraǵattarǵa qol jetkizý jolyn jáne joǵary oqý oryndary arasyndaǵy ǵylymi bailanystardy damytý asa mańyzdy. Shyn máninde, bizdiń mádeniet, bilim, ǵylym salalaryndaǵy súrleýimizdi parallel emes, kerisinshe, ortaq jolǵa ainaldyrýǵa tolyq múmkindik bar», – dedi Qazaqstan Parlamenti Senatynyń Tóraǵasy.
Óz kezeginde Tanzila Narbaeva Forýmda aitylǵan ideialarǵa qoldaý bildirip, ony ótkizýdiń ózekti ekenin jáne mundai tyń bastamanyń mádeni-gýmanitarlyq bailanystardy odan ári keńeitýdegi erekshe mańyzyn atap ótti.
Irgeli is-sharada Qazaqstannyń Halyq jazýshysy Tólen Ábdik, Ózbekstan Kórkem akademiiasynyń tóraǵasy Akmal Nýridinov, QR Prezidenti janyndaǵy Qazaqstan Respýblikasynyń Ulttyq ǵylym akademiiasynyń prezidenti Aqylbek Kúrishbaev, Ózbekstan Respýblikasy Ǵylym akademiiasynyń vitse-prezidenti Bahrom Abdýhalimov, «Qazaq gazetteri» JShS Bas direktory Dihan Qamzabekuly, Ózbekstan Jazýshylar odaǵynyń tóraǵasy Sirojiddin Saidov, Qazaqstan Parlamenti Senatynyń depýtattary, ǵylymi jáne shyǵarmashyl ziialy qaýym men sarapshylar qaýymdastyǵynyń ókilderi sóz sóiledi. Olar qazaq-ózbek bailanysyn odan ári nyǵaitýǵa arnalǵan jobalar men ideialardy iske asyrý jóninde óz oilaryn aityp, usynystaryn jetkizdi.
Sondai-aq búgin Ózbekstan Respýblikasy Olii Májilisi Senatynyń Tóraǵasy Qazaqstan Respýblikasy Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń múshelerimen kezdesti. Onda genderlik teńdik máseleleri keńinen talqylandy jáne qatysýshylar óńirdi ornyqty damytý jolynda áielderdiń ekonomikalyq múmkindikterin arttyrýǵa qatysty jobalar jóninde pikir almasyp, negizgi baǵyttar boiynsha birlesken bastamalar ázirledi. Tanzila Narbaeva áielderdiń múmkindikterin keńeitý, genderlik teńdikti institýtsionaldyq turǵyda qoldaýdy nyǵaitý jáne tájiribe almasý máselelerin jan-jaqty talqylaýdyń mańyzdy ekenin tilge tiek etti.
