قازاقستان پارلامەنتٸ سەناتىنىڭ تٶراعاسى مەۋلەن ەشٸمباەۆ پەن ٶزبەكستان وليي مەجٸلٸسٸ سەناتىنىڭ تٶراعاسى تانزيلا نارباەۆا استانادا ٶتكەن قازاق-ٶزبەك عىلىمي-شىعارماشىل زييالىلارىنىڭ العاشقى فورۋمىندا سٶز سٶيلەدٸ. ٸس-شارا ت.نارباەۆانىڭ قازاقستانعا رەسمي ساپارى اياسىندا ۇيىمداستىرىلدى, دەپ حابارلايدى Dalanews.kz.
فورۋم بارىسىندا ەكٸ ەلدەگٸ عىلىمي جەنە مەدەني ورتانىڭ ٶكٸلدەرٸ مەدەني-گۋمانيتارلىق ىنتىماقتاستىقتى نىعايتۋعا, حالىقتىق ديپلوماتييانى دامىتۋعا جەنە دەستٷر ساباقتاستىعىن ساقتاۋعا قاتىستى ماڭىزدى مەسەلەلەردٸ تالقىلادى. سونداي-اق ولار بٸرقاتار باعىتتا ٶزارا بايلانىستى ودان ەرٸ ارتتىرۋ جولىنداعى باسىم مٸندەتتەردٸ بەلگٸلەدٸ.
مەۋلەن ەشٸمباەۆ ٶز سٶزٸندە قازاقستان مەن ٶزبەكستان زييالىلارىنىڭ العاشقى فورۋمى مەملەكەت باسشىسىنىڭ تٸكەلەي تاپسىرماسىمەن ٶتكٸزٸلٸپ جاتقانىن ايتتى. پرەزيدەنت ەكٸ ەلدٸڭ عىلىمي-شىعارماشىل زييالىلارىنىڭ ٶزارا بايلانىسىنا ٷنەمٸ باسا مەن بەرٸپ كەلەدٸ. وسى ورايدا بۇل الاڭ باۋىرلاس حالىقتاردىڭ گۋمانيتارلىق ىنتىماقتاستىعىن تەرەدەتۋگە جول اشاتىن ماڭىزدى باستاما ەكەنٸ انىق.
«سوڭعى جىلداردا قازاقستان پرەزيدەنتٸ قاسىم-جومارت كەمەلۇلى توقاەۆ پەن ٶزبەكستان پرەزيدەنتٸ شاۆكات ميرومونوۆيچ ميرزيەەۆتٸڭ باسشىلىعىمەن قازاق-ٶزبەك قارىم-قاتىناسى بۇرىن-سوڭدى بولماعان جوعارى دەڭگەيگە كٶتەرٸلدٸ. بۇل رەتتە مەدەني-گۋمانيتارلىق سالاداعى ىنتىماقتاستىق باسىم باعىتتاردىڭ بٸرٸ ەكەنٸن اتاپ ٶتكەن جٶن. شىن مەنٸندە, مەدەنيەت, ٶنەر, بٸلٸم دەگەنٸمٸز – ەشقانداي ساياسات سالقىنى بۇزا المايتىن مىزعىماس كٶپٸرلەر. ولار قاشاندا ورتاق تاريحقا, ٶزارا قۇرمەتكە جەنە قۇندىلىقتارعا تابان تٸرەيدٸ. عىلىمي جەنە شىعارماشىل ورتانىڭ بٷگٸنگٸ كەزدەسۋٸ الداعى ۋاقىتتا تىڭ يدەيالارمەن, ماڭىزدى ويلارمەن جەنە جاڭا جوسپارلارمەن الماساتىن دەستٷرلٸ الاڭعا اينالادى دەپ سەنەمٸز. وسىنداي يگٸلٸكتٸ ٸس ارقىلى بٸز بٸر-بٸرٸمٸزدٸڭ ٷنٸمٸزگە قۇلاق اسىپ, ورتاق جارقىن بولاشاق جولىندا ماڭىزدى قادام جاسايمىز», – دەدٸ سەنات سپيكەرٸ.
سونىمەن قاتار مەۋلەن ەشٸمباەۆ قازٸرگٸ جاعدايدا قازاقستان مەن ٶزبەكستان حالىقتارى اراسىنداعى دوستىقتى قالىپتاستىرىپ, نىعايتاتىن ادامي بايلانىستار دا ەرەكشە مەنگە يە ەكەنٸن اتاپ ٶتتٸ. بۇل رەتتە جاستار ايرىقشا رٶل اتقاراتىنى انىق. سوندىقتان بٸلٸم, عىلىم, مەدەنيەت سالالارىنداعى ورتاق باعدارلامالاردى كەڭەيتۋ, بٸرلەسكەن زەرتتەۋلەر جٷرگٸزٸپ, تەجٸريبە الماسۋ, كرەاتيۆتٸ جەنە IT-جوبالاردى ٸسكە اسىرۋ اسا ماڭىزدى.
«بٸزدٸڭ ەلدەرٸمٸز عىلىمعا ٷلكەن كٶڭٸل بٶلٸپ وتىر. بۇل – قۋانتارلىق جايت. بىلتىر استانادا ٶتكەن ورتالىق ازييا تاريحشىلارىنىڭ فورۋمى ورتاق تاريحىمىزدى كەسٸبي تۇرعىدان قايتا قاراۋدىڭ قانشالىقتى قاجەت ەكەنٸن ايقىن كٶرسەتٸپ بەردٸ. وسىعان بايلانىستى الداعى ۋاقىتتا بٸرلەسكەن زەرتتەۋلەردٸ, مۇراعاتتارعا قول جەتكٸزۋ جولىن جەنە جوعارى وقۋ ورىندارى اراسىنداعى عىلىمي بايلانىستاردى دامىتۋ اسا ماڭىزدى. شىن مەنٸندە, بٸزدٸڭ مەدەنيەت, بٸلٸم, عىلىم سالالارىنداعى سٷرلەۋٸمٸزدٸ پاراللەل ەمەس, كەرٸسٸنشە, ورتاق جولعا اينالدىرۋعا تولىق مٷمكٸندٸك بار», – دەدٸ قازاقستان پارلامەنتٸ سەناتىنىڭ تٶراعاسى.
ٶز كەزەگٸندە تانزيلا نارباەۆا فورۋمدا ايتىلعان يدەيالارعا قولداۋ بٸلدٸرٸپ, ونى ٶتكٸزۋدٸڭ ٶزەكتٸ ەكەنٸن جەنە مۇنداي تىڭ باستامانىڭ مەدەني-گۋمانيتارلىق بايلانىستاردى ودان ەرٸ كەڭەيتۋدەگٸ ەرەكشە ماڭىزىن اتاپ ٶتتٸ.
ٸرگەلٸ ٸس-شارادا قازاقستاننىڭ حالىق جازۋشىسى تٶلەن ەبدٸك, ٶزبەكستان كٶركەم اكادەميياسىنىڭ تٶراعاسى اكمال نۋريدينوۆ, قر پرەزيدەنتٸ جانىنداعى قازاقستان رەسپۋبليكاسىنىڭ ۇلتتىق عىلىم اكادەميياسىنىڭ پرەزيدەنتٸ اقىلبەك كٷرٸشباەۆ, ٶزبەكستان رەسپۋبليكاسى عىلىم اكادەميياسىنىڭ ۆيتسە-پرەزيدەنتٸ باحروم ابدۋحاليموۆ, «قازاق گازەتتەرٸ» جشس باس ديرەكتورى ديحان قامزابەكۇلى, ٶزبەكستان جازۋشىلار وداعىنىڭ تٶراعاسى سيروجيددين سايدوۆ, قازاقستان پارلامەنتٸ سەناتىنىڭ دەپۋتاتتارى, عىلىمي جەنە شىعارماشىل زييالى قاۋىم مەن ساراپشىلار قاۋىمداستىعىنىڭ ٶكٸلدەرٸ سٶز سٶيلەدٸ. ولار قازاق-ٶزبەك بايلانىسىن ودان ەرٸ نىعايتۋعا ارنالعان جوبالار مەن يدەيالاردى ٸسكە اسىرۋ جٶنٸندە ٶز ويلارىن ايتىپ, ۇسىنىستارىن جەتكٸزدٸ.
سونداي-اق بٷگٸن ٶزبەكستان رەسپۋبليكاسى وليي مەجٸلٸسٸ سەناتىنىڭ تٶراعاسى قازاقستان رەسپۋبليكاسى پرەزيدەنتٸنٸڭ جانىنداعى ەيەلدەر ٸستەرٸ جەنە وتباسىلىق-دەموگرافييالىق ساياسات جٶنٸندەگٸ ۇلتتىق كوميسسييانىڭ مٷشەلەرٸمەن كەزدەستٸ. وندا گەندەرلٸك تەڭدٸك مەسەلەلەرٸ كەڭٸنەن تالقىلاندى جەنە قاتىسۋشىلار ٶڭٸردٸ ورنىقتى دامىتۋ جولىندا ەيەلدەردٸڭ ەكونوميكالىق مٷمكٸندٸكتەرٸن ارتتىرۋعا قاتىستى جوبالار جٶنٸندە پٸكٸر الماسىپ, نەگٸزگٸ باعىتتار بويىنشا بٸرلەسكەن باستامالار ەزٸرلەدٸ. تانزيلا نارباەۆا ەيەلدەردٸڭ مٷمكٸندٸكتەرٸن كەڭەيتۋ, گەندەرلٸك تەڭدٸكتٸ ينستيتۋتسيونالدىق تۇرعىدا قولداۋدى نىعايتۋ جەنە تەجٸريبە الماسۋ مەسەلەلەرٸن جان-جاقتى تالقىلاۋدىڭ ماڭىزدى ەكەنٸن تٸلگە تيەك ەتتٸ.
