QR Mádenıet jáne aqparat mınıstri Aıda Balaeva jańa Óner mýzeıin tamashalady, dep habarlaıdy Dalanews.kz.
Mınıstr 1600-den astam ulttyq mýzykalyq aspap qoıylǵan mýzeı ekspozısıasymen tanysty. Mýzeıde sırek kezdesetin jáne umyt bola bastaǵan aspaptarǵa erekshe nazar aýdarylǵan. Atap aıtsaq, jelbýaz, mes syrnaı, ýildek, tastaýyq jáne basqa da kóne aspaptar bar. Barlyq eksponatty mýzeı qyzmetkerleri qoldan jasaǵan. Sonymen qatar, kópshilikke ulttyq kıimder zaly men mekemeniń sheberhanasy kórsetildi.
Aıda Balaeva Qazaqstanda kóne ulttyq mýzykalyq aspaptar, áshekeı buıymdar men kıimderdi qalpyna keltire alatyn sheberlerdiń jetispeýshiligi týraly sóz qozǵady. Mınıstrdiń aıtýynsha, Astanada osyndaı mýzeıdiń ashylýy ulttyq mádenıet pen qolónerdi nasıhattaýǵa zor úles qosady.
«Mýzykalyq aspaptar da, ulttyq kıim de – bizdiń ulttyq muramyzdyń bir bóligi. Jaqynda Kreatıvti ındýstrıa qoryn ashqanymyzdy bilesizder. Osy atalǵan dúnıeler kreatıvti ındýstrıanyń quramdas bóligi bolǵandyqtan, mýzeıdiń fılıalyn sol qordyń janynan ashýdy usynamyn. Qor men mýzeıge týrıser men sheteldik qonaqtar keledi, al bul óz kezeginde ulttyq mádenıetimizdi el ishinde de, shet elde de tanytýǵa yqpal etedi», – dedi mınıstr.
İs-shara aıasynda JOSHY QAZAQ NATIONAL GROUP mýltıaspaptyq ansambli óner kórsetti. Ujym ártisteri aspaptaryn ózderi jasap, avtorlyq kompozısıalar jazady.
Óner mýzeıi XIX ǵasyrdyń sońynda salynǵan tarıhı mektep ǵımaratynda ornalasqan. 1982 jyly bul nysan respýblıkalyq mańyzy bar tarıh jáne mádenıet eskertkishteri tizimine engizilip, memleket qorǵaýyna alynǵan. Mýzeıde kóne mýzykalyq aspaptardy qalpyna keltirý jáne saqtaý sheberhanasy jumys isteıtin bolady.
Jańa mýzeı qalalyq Birikken mýzeıler dıreksıasynyń quramynda jumys isteıdi. Oǵan saıası qýǵyn-súrgin jáne totalıtarızm qurbandaryna arnalǵan «ALJIR» memorıaldyq kesheni men Sáken Seıfýllın mýzeıi kiredi.
