Elorda kúnnen-kúnge ósip, órkendep keledi. Jańa turǵyn aýdandar, áleýmettik nysandar, kósheler men kópirler ashylýda. Al onyń bárin kútip baptap ustaý isi ońai emes. Sondyqtan jyl ótken saiyn kommýnaldyq qyzmet salasynyń júkteme artyp keledi. Elordanyń qatal qysyna qaramastan, kommýnaldyq kásiporyn qyzmetkerleri kez kelgen aýa raiynda kúndiz de, túnde de jumys isteýge ázir.
– Qalamyzdaǵy kommýnaldyq qyzmetkerleriniń qolaily jaǵdaida eńbek etýi úshin kommýnaldyq qyzmetterdiń avtoparkin únemi jańartyp otyramyz. Sonymen qatar jalaqy mólsherin arttyryp, qosymsha syiaqy berýdi de engizdik. Máselen sońǵy jyldardyń ózinde 300-den astam arnaiy tehnika men jabdyq satyp alyndy. Osylaisha, avtopark aitarlyqtai jańartyldy, sebebi jumys qyzyp jatqan tusta eski tehnikalardyń isten shyqqan kezi bolǵan, – degen edi qala ákimi Altai Kólginov.
Qys mezgilinde qalanyń kommýnaldyq qyzmetteri kóshelerdi, áleýmettik nysandarǵa kirer joldardy, jaiaý júrginshilerge arnalǵan trotýarlardy, aialdamalardy tazalaýǵa erekshe nazar aýdarylǵan. Al aýdan ákimdikteri aýla ishindegi aýmaqtardy jinaý boiynsha PIK (MIB) jumysyn baqylaitynyn aita ketýimiz kerek.
