Astanada jedel járdem stantsiiasynan 850 mln teńge kólemindegi biýdjet qarajatyn jymqyrý shemasy áshkerelendi, dep habarlaidy Dalanews.kz.
Málimetke sáikes, Astana qalasynyń prokýratýrasy men UQK departamenti birlesip, 2020–2023 jyldar aralyǵynda jedel járdem stantsiiasynyń biýdjet qarajatyn jymqyrý faktilerin anyqtaǵan. Arnaiy prokýrorlardyń basshylyǵymen vedomstvoaralyq tergeý-jedel toby qurylǵan.
Tergeý barysynda sanitarlyq avtokólikterdiń qosalqy bólshekterin zańsyz esepten shyǵarý jáne jalǵan qyzmet kórsetý sharttaryn jasaý derekteri belgili bolǵan. Sonyń saldarynan jumys istep turǵan kólikter sany azaiyp, qalǵany bólshekterdiń urlanýyna bailanysty paidalanýdan shyǵarylǵan.
Prokýratýranyń habarlaýynsha, qazirgi tańda "103" jedel járdem avtoparki tolyq qalpyna keltirilgen.
Is aiasynda tórt adam ustaldy, olardyń qatarynda orta býynnyń eki basshysy men jedel járdem stantsiiasynyń direktory bar. Kúdiktilerdiń áreketi saldarynan memleketke asa iri kólemde 850 mln teńge shyǵyn keltirilgen.
Olardyń is-áreketi Qylmystyq kodekstiń 189-baby boiynsha, aldyn ala sóz bailasý arqyly adamdar tobynyń, memlekettik fýnktsiialardy oryndaýǵa ýákiletti adamdarǵa teńestirilgen tulǵalardyń senip tapsyrylǵan bóten múlikti asa iri mólsherde iemdenýi retinde saralanǵan. Qylmystyq is sotqa joldandy.
