Elordada «Jasyl el» stýdenttik qurylys jáne jastar eńbek jasaqtarynyń 21-eńbek maýsymynyń ashylýy saltanatty túrde atap ótildi, – dep habarlaidy Dalanews.kz
Is-shara amfiteatrda Astana qalasy Jastar saiasaty máseleleri basqarmasynyń, Áielder isteri jáne otbasylyq-demografiialyq saiasat jónindegi komissiianyń, «Stýdenttik qurylys jáne jastar jasaqtarynyń respýblikalyq qozǵalysy» qoǵamdyq qorynyń qoldaýymen ótti.
«Jobaǵa 14 pen 35 jas aralyǵyndaǵy jastar qatysa alady. Jumys isteitinderge 64 564 teńge mólsherinde jalaqy men arnaiy forma beriledi. Oqýshylar mektep aýmaǵynda jumys isteýge quqyly. Al eresek jastar qalamyzdyń saiabaqtary men gúlzarlarynda eńbek ete alady. Eńbek kodeksine sáikes, kámeletke tolmaǵan balalar kúnine 4 saǵat, aptasyna 5 kún jumys istei alady. Bul jobada biz tolyq emes, kópbalaly otbasylardan shyqqan balalar men áleýmettik osal toptarǵa basymdyq beremiz», – dedi Jastar saiasaty máseleleri basqarmasynyń ókili Erlan Aidar.
Mektep aýmaǵynda balalarǵa áleýmettik pedagogtar bekitilgen. Ár mektepte 15 bala eńbek etedi. 2024 jyly «Jasyl el» baǵdarlamasymen 4 000 bala qamtyldy, biraq suranystyń artýyna bailanysty biyl 5 200 jumys orny qarastyryldy.
«Bul kópbalaly jáne múgedek balalary bar otbasylar úshin úlken kómek bolmaq. Baǵdarlama aiasynda beriletin arnaiy kiim balalarda qalady. Jaz sońynda olar tapqan qarajatqa ózderine qajetti zattar ala alady. Sonymen qatar balalar jańa dostar taýyp, aralasatyn ortasy keńeiedi. Bul – naǵyz netvorking. Baǵdarlamaǵa qatysyp ósken balalardyń kóbi jyl boiy volonterlik qyzmetpen ainalysady. Olar úshin bul tek 4 ailyq jumys emes. Eger kóshbasshylyq qabiletteri anyqtalsa, bilim, mádeniet jáne sport basqarmalary olardy damytý men áleýmettik ósýge qosymsha múmkindikter usynady», – dedi qala ákimdigi janyndaǵy Áielder isteri jáne otbasylyq-demografiialyq saiasat jónindegi komissiia tóraǵasynyń orynbasary Nazgúl Maǵjan.
Is-shara barysynda kontserttik baǵdarlama usynyldy. Onda qazaqstandyq ánshi Ibragim Eskendir, «Erekshe merekeler» qoǵamdyq qorynyń ártisteri jáne «BalaTime» shyǵarmashylyq stýdiiasynyń tárbielenýshileri óner kórsetti.
«Biyl men «Jasyl el» baǵdarlamasyna alǵash ret qatysyp otyrmyn. Bul joba jaily alǵash internetten bildim, keiin qatysýǵa ótinim berdim. Ókinishke qarai, keibir jastar ekologiianyń mańyzyn tolyq túsinbeidi: kóshege qoqys tastaidy, aǵash syndyrady. Osy jumystyń arqasynda biz tabiǵatty qorǵaýdyń mańyzyn jaqsyraq túsine bastadyq jáne ózgelerge úlgi bola alamyz. Qala turǵyndary bizge alǵys aityp, rizashylyq bildiredi, bul – biz úshin úlken motivatsiia», — dedi jobanyń qatysýshysy, 11-synyp oqýshysy Jansezim Qambar.
