Astanada qala ákimi Jeńis Qasymbektiń tóraǵalyǵymen Qazaqstan Respýblikasynyń jańa Konstitýtsiiasynyń jobasyn talqylaýǵa arnalǵan kezdesý ótti, dep habarlaidy Dalanews.kz.
Jiynǵa máslihat depýtattary, Qoǵamdyq keńes músheleri, ákimdik basqarmalarynyń basshylary, aýdan ákimderi, sondai-aq memlekettik jáne qoǵamdyq uiymdardyń ókilderi qatysty.
Kezdesý barysynda Konstitýtsiialyq komissiia músheleri Astana qalalyq máslihatynyń tóraǵasy Tabiǵat Zeinulqabden men Qoǵamdyq keńes tóraǵasy Zýlfýhar Gaipov Konstitýtsiianyń jańa redaktsiiasynda kózdelgen negizgi ózgerister men tujyrymdamalyq jańalyqtar týraly baiandady.
Qala ákimi óz sózinde Ata Zańdy jańartý jumystary Memleket basshysynyń tapsyrmasyna sáikes júrgizilip jatqanyn atap ótti. Onyń aitýynsha, Konstitýtsiialyq komissiia Prezident Jarlyǵymen qurylǵan jáne onyń quramyna memlekettik organdardyń ókilderi, sarapshylar men azamattyq qoǵam músheleri engen.
Kezdesýge qatysýshylar jańa Konstitýtsiia jobasynda táýelsizdik, aýmaqtyq tutastyq, ulttyq biregeilik siiaqty negizgi qundylyqtarmen qatar, adam quqyqtary men bostandyqtaryn qorǵaý máselelerine erekshe mán berilgenin aitty. Sonymen birge bilim, ǵylym, innovatsiia jáne ekologiia salalary el damýynyń strategiialyq basymdyqtary retinde aiqyndalǵan.
Jiyn qorytyndysynda aldaǵy kezeńde konstitýtsiialyq ózgeristerdiń mánin qoǵamǵa keńinen túsindirý jáne turǵyndardyń usynys-pikirlerin jinaý mańyzdy ekeni atap ótildi.
