استانادا قالا اكىمى جەڭىس قاسىمبەكتىڭ توراعالىعىمەن قازاقستان رەسپۋبليكاسىنىڭ جاڭا كونستيتۋسياسىنىڭ جوباسىن تالقىلاۋعا ارنالعان كەزدەسۋ ءوتتى، دەپ حابارلايدى Dalanews.kz.
جيىنعا ءماسليحات دەپۋتاتتارى، قوعامدىق كەڭەس مۇشەلەرى، اكىمدىك باسقارمالارىنىڭ باسشىلارى، اۋدان اكىمدەرى، سونداي-اق مەملەكەتتىك جانە قوعامدىق ۇيىمداردىڭ وكىلدەرى قاتىستى.
كەزدەسۋ بارىسىندا كونستيتۋسيالىق كوميسسيا مۇشەلەرى استانا قالالىق ءماسليحاتىنىڭ ءتوراعاسى تابيعات زەينۇلقابدەن مەن قوعامدىق كەڭەس ءتوراعاسى زۋلفۋحار گايپوۆ كونستيتۋسيانىڭ جاڭا رەداكسياسىندا كوزدەلگەن نەگىزگى وزگەرىستەر مەن تۇجىرىمدامالىق جاڭالىقتار تۋرالى باياندادى.
قالا اكىمى ءوز سوزىندە اتا زاڭدى جاڭارتۋ جۇمىستارى مەملەكەت باسشىسىنىڭ تاپسىرماسىنا سايكەس جۇرگىزىلىپ جاتقانىن اتاپ ءوتتى. ونىڭ ايتۋىنشا، كونستيتۋسيالىق كوميسسيا پرەزيدەنت جارلىعىمەن قۇرىلعان جانە ونىڭ قۇرامىنا مەملەكەتتىك ورگانداردىڭ وكىلدەرى، ساراپشىلار مەن ازاماتتىق قوعام مۇشەلەرى ەنگەن.
كەزدەسۋگە قاتىسۋشىلار جاڭا كونستيتۋسيا جوباسىندا تاۋەلسىزدىك، اۋماقتىق تۇتاستىق، ۇلتتىق بىرەگەيلىك سياقتى نەگىزگى قۇندىلىقتارمەن قاتار، ادام قۇقىقتارى مەن بوستاندىقتارىن قورعاۋ ماسەلەلەرىنە ەرەكشە ءمان بەرىلگەنىن ايتتى. سونىمەن بىرگە ءبىلىم، عىلىم، يننوۆاسيا جانە ەكولوگيا سالالارى ەل دامۋىنىڭ ستراتەگيالىق باسىمدىقتارى رەتىندە ايقىندالعان.
جيىن قورىتىندىسىندا الداعى كەزەڭدە كونستيتۋسيالىق وزگەرىستەردىڭ ءمانىن قوعامعا كەڭىنەن ءتۇسىندىرۋ جانە تۇرعىنداردىڭ ۇسىنىس-پىكىرلەرىن جيناۋ ماڭىزدى ەكەنى اتاپ ءوتىلدى.
