23 shilde kúni Astanada stendap-komik Abylai Isinniń «Invalidy, alǵa» atty erekshe improvizatsiialyq kontserti ótedi. Sharaǵa múmkindigi shekteýli jandarmen qatar barlyq qala turǵyndary qatysa alady, dep habarlaidy dalanews.kz.
Jobanyń basty ereksheligi – sahnaǵa kásibi ázilkeshtermen birge múmkindigi shekteýli azamattardyń da shyǵýy. Uiymdastyrýshylardyń aitýynsha, olardyń maqsaty aiaýshylyq týdyrý emes, kórermendi kúldirip, qoǵamdaǵy kedergiler men stereotipterdi joiý.
Abylai Isin negizgi mamandyǵy boiynsha PR salasynda jumys isteidi. Ózi úshinshi toptaǵy múgedektigi bar azamat. Bos ýaqytynda Astanadaǵy stendap alańdarynda óner kórsetip, óz ómiri men múmkindigi shekteýli jandar kúndelikti kezdesetin qiyndyqtardy ázil arqyly jetkizedi.
Aldaǵy kontsert – osy formattaǵy úshinshi kesh bolmaq. Buǵan deiin sáýir jáne mamyr ailarynda ótken stendap-shoýlar kórermen tarapynan úlken qyzyǵýshylyqqa ie bolǵan.
«Qoǵamda keide múmkindigi shekteýli adamdarǵa jaqyndaýǵa qorqatyn nemese aiaýshylyqpen qaraityn jandar kezdesedi. Munyń bári – jaman nietten emes, bilmestikten týyndaidy. Mundai túsinispeýshilikti joiýdyń eń tiimdi joly – dáris nemese áleýmettik jarnama emes, adamdardyń tikelei qarym-qatynasy, ortaq áńgime men kúlkisi. Osy ideiadan bizdiń joba dúniege keldi», – deidi Abylai Isin.
Onyń aitýynsha, alǵashqy eki kontsertten keiin Qazaqstannyń ártúrli qalalarynan múmkindigi shekteýli azamattar habarlasyp, stendap janrynda ózderin synap kórýge jáne jobaǵa qatysýǵa niet bildirgen.
«Invalidy, alǵa» stendap-shoýy 23 shilde kúni Astanadaǵy The Bus klýbynda ótedi. Shara týraly tolyq aqparat Abylai Isinniń áleýmettik jelidegi paraqshasynda jariialanǵan.
