Astanada jedel meditsinalyq járdem feldsheri Uldana Myrzýannyń qazasyna qatysty qylmystyq is boiynsha sot otyrysy jalǵasyp jatyr, dep habarlaidy dalanews.kz.
Astana qalasynyń qylmystyq ister jónindegi aýdanaralyq sotynda ótken kezekti otyrysta aldymen kýáger G. Aqshalovadan qosymsha jaýap alyndy.
Odan keiin turǵyn úidegi qaiǵyly oqiǵadan soń ǵimaratqa tehnikalyq zertteý júrgizgen «Astana-Tehnadzor» JShS mamany D. Vorobevten jaýap alyndy. Buǵan deiin sotta qurylys sarapshylary úidiń qasbeti men qurylysynda birqatar kemshilik bolǵanyn aitqan.
Sot otyrysynda memlekettik aiyptaýshy N. Abýov kondominiým nysanynyń burynǵy senim bildirilgen tulǵalaryna qatysty Qazaqstan Respýblikasy Qylmystyq kodeksiniń 254-baby boiynsha qylmystyq istiń Sotqa deiingi tergep-tekserýlerdiń biryńǵai tiziliminde tirkelgeni týraly raportty is materialdaryna qosýdy surady.
Sonymen qatar prokýror Astana qalasy prokýrorynyń orynbasary bekitken turǵyn úi qurylys salýshysyna qatysty qylmystyq isti toqtatý týraly qaýlyny da is materialdaryna tirkeý týraly ótinishhat berdi.
Túski úzilisten keiin sot Astana qalasy boiynsha Quqyqtyq statistika jáne arnaiy esepke alý komiteti departamentinen, sondai-aq Astana qalasynyń Turǵyn úi jáne turǵyn úi inspektsiiasy basqarmasynan kelip túsken jaýaptardy zerttedi.
Sotta qaralyp jatqan is 2025 jylǵy 8 qarashada Astanada turǵyn úidiń qasbeti opyrylyp, sonyń saldarynan jedel járdem feldsheri Uldana Myrzýannyń aýyr jaraqat alýyna bailanysty qozǵalǵan. Ol alǵan jaraqattarynan 18 qarashada kóz jumdy.
Buǵan deiin sotta qurylys sarapshysy Denis Vorobev qasbettiń opyrylýynyń kenetten bolmaǵanyn jáne oǵan deiin belgili bir ýaqyt boiy aqaýlar qalyptasqanyn aitqan. Onyń pikirinshe, qaiǵyly jaǵdaiǵa qurylys sapasy sebep bolǵan.
Kelesi sot otyrysy 2026 jylǵy 16 qyrkúiekke saǵat 10:00-ge belgilendi.
Jábirlenýshi ókili, advokat J. Qurymbaevanyń ótinishhatyna sáikes, kelesi otyrysta Uldana Myrzýanǵa operatsiia jasaǵan neirohirýrg dárigerden, sondai-aq Astana qalasynyń Qalalyq ortany baqylaý jáne sapa basqarmasynyń burynǵy mamanynan jaýap alynady.
