Astanada Áielder isteri jáne otbasylyq-demografiialyq saiasat jónindegi komissiianyń otyrysy ótti. Onda erekshe bilim berý qajettilikteri bar balalardy qoldaý, múmkindigi shekteýli jandardy áleýmettik beiimdeý jáne jastar arasyndaǵy qaýipsizdik máseleleri qaraldy, dep habarlaidy Dalanews.kz
Qala ákiminiń orynbasary Eset Baikenniń tóraǵalyǵymen ótken jiynǵa aýdan ákimderiniń orynbasarlary, basqarma basshylary, qoǵamdyq uiymdar men sarapshylar qatysty.
Búginde Astanada 38 myńnan astam múmkindigi shekteýli adam turady, onyń ishinde 27 myńy – eresekter, 10 myńnan astamy – balalar. Qalada erekshe jandarǵa jan-jaqty qoldaý kórsetiledi: 2025 jyly bul maqsatqa 29 myńnan astam arnaiy qural-jabdyqtar men qyzmet túrleri usynyldy.
Jyl basynan beri Mansap ortalyǵyna 535 múmkindigi shekteýli jas jumysqa ornalasý úshin júgingen. Onyń 185-i áleýmettik qorǵaý sharalarymen qamtyldy. Nátijesinde 7 jas turaqty jumysqa turdy, 122 jas qoǵamdyq jumystarǵa jiberildi, 37 jas «Bastaý Biznes» baǵdarlamasy aiasynda oqýyn bastap, 3 jas jańa biznes-ideiaǵa grant iegeri atandy.
Sońǵy jyldary invataksi parki úsh eseden asa ulǵaiyp, búginde 129 kólik qyzmet kórsetedi. Sondai-aq, qalada 11 áleýmettik mekeme jáne birqatar ÚEU múmkindigi shekteýli balalarǵa arnaiy áleýmettik qyzmetter usynady. 2025 jyly mundai qyzmetpen 7 800-den astam adam qamtylǵan.
Otyrysta kámeletke tolmaǵandar men jastar arasyndaǵy qaýipsizdik sharalary da qaraldy. Komissiia músheleri balalardyń quqyqtaryn qorǵaý salasyndaǵy vedomstvoaralyq ózara is-qimyldy kúsheitý qajettigin atap ótti.
«Jiyn qorytyndysy boiynsha halyqtyń osal toptaryn qoldaýǵa baǵyttalǵan qosymsha sharalar ázirleý jáne iske asyrý jóninde ýákiletti organdarǵa naqty tapsyrmalar berildi», – dedi komissiia tóraǵasynyń orynbasary Nazgúl Maqjan.
