Astanada biznes-trener 50 million teńgeden astam zalal keltirgen alaiaqtyq úshin sottaldy. Bul týraly elorda prokýratýrasy málimdedi, dep habarlaidy Dalanews.kz.
Is materialdaryna sáikes, áiel Instagram jelisi arqyly onlain-saýda júrgizýdi úiretetin kýrstar usynǵan. Oqýdy aiaqtaǵandarǵa ol turmystyq tehnikany kóterme baǵamen satý isine investitsiia salýǵa keńes berip, salynǵan qarajattan 10% paida ýáde etken.
"Tólemdi alǵan soń, ýáde etilgen qyzmetterdi oryndamai, klienttermen bailanysty úzgen jáne iz-tússiz ketken. Memlekettik aiyptaýshy aiyptalýshynyń on alaiaqtyq epizody boiynsha kinásin tolyq dáleldedi", – delingen resmi habarlamada.
Sottyń úkimimen áiel bes jylǵa bas bostandyǵynan aiyryldy.
