Elordada esirtki zattaryn jarnamalaityn graffiti sýretterdi boiaýǵa arnalǵan kezekti aktsiia ótti,- dep habarlaidy Dalanews.kz
Is-shara Saraishyq kóshesinde uiymdastyryldy. Oǵan qalalyq politsiia departamentiniń esirtki qylmystaryna qarsy is-qimyl basqarmasynyń qyzmetkerleri, «Astana jastary» jastar resýrstyq ortalyǵynyń eriktileri, tanymal sportshylar men blogerler qatysty.
Olar esirtki saittarynyń mekenjailary kórsetilgen belgilerdi boiap, olardyń ornyna «Nashaqorlyqqa jol joq!» degen jazýy bar graffiti saldy.
Sharany Esil aýdany ákiminiń apparaty, Astana qalasy PD esirtki qylmysyna qarsy is-qimyl basqarmasy jáne aýdandyq politsiia basqarmasy birlesip uiymdastyrdy.
Astana qalasy kikboksing federatsiiasynyń vitse-prezidenti, №7 BJSM aǵa jattyqtyrýshysy, esirtki qylmysyna qarsy is-qimyl keńesiniń múshesi Ernar Omarov óz pikirin bildirdi.
«Men ómir boiy osy qalada turyp kelemin jáne onyń árbir turǵynynyń taǵdyryna alańdaimyn. Sondyqtan osyndamyn. Biz esirtki jarnamalaǵan sýretterdi boiap jatyrmyz. Jattyǵýlarda shákirtterime neniń jaqsy, neniń jaman ekenin túsindiremin. Esirtki – zulymdyq. Onymen sózben de, ispen de kúresý kerek», – dedi ol.
Osy pikirdi elordalyq avtomotosport federatsiiasynyń prezidenti, esirtki qylmysyna qarsy is-qimyl keńesiniń múshesi Anatolii Bondar da qoldaidy.
«Bizdiń mindetimiz – narkograffitidi joiý úshin barynsha kúsh salý. Biz quqyq qorǵaý organdarymen on jyldan beri birlesip jumys istep kelemiz. Sebebi jastardyń taǵdyryna alańdaimyz jáne olardyń esirtkige emes, sportqa bet burǵanyn qalaimyz», – dedi ol.
NEET sanatyndaǵy jastarmen jumys isteý bóliminiń basshysy Sultan Ómirǵalievtiń aitýynsha, bul shara «Zań jáne tártip» baiandaý formaty aiasynda ótip jatyr.
«Biz óskeleń urpaqqa esirtkiniń ziianyn aldyn ala túsindirýimiz kerek. Onyń ornyna sport, kitap oqý, saiahat jasaý siiaqty mańyzdy ister baryn kórsetkenimiz jón», – dep qosty ol.
