Táýelsizdik alǵan jyldardan keiin Astana qalasy qarqyndy damyp, kóptegen tarihi sátterdi bastan ótkerdi. Bas qalamyz Astana atanǵannan kúnnen bastap jańa qalanyń damýy bastalyp, búgingi kúnge deiin jalǵasyn taýyp jatyr. Osy aptada elordada ashylǵan tuńǵysh qazaq mektebi Álimhan Ermekov atyndaǵy №38 mektep-litseii 25 jyldyǵyn atap ótti, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
1998 jyly Qazaqstannyń jańa astanasy jariialanyp, elorda mártebesine ie bolǵan Aqmola qalasynda qazaq mektepterine degen suranys erekshe artty. Sol ýaqytqa deiin qalada qazaq tilinde bilim beretin mektepter sany az boldy, sebebi aimaqtyń etnodemografiialyq qurylymynda orys tildi halyq basym edi. Elordanyń Almatydan kóshirilýi jáne memlekettik tildiń mártebesin arttyrý saiasaty qazaq mektepterin ashý qajettiligin kún tártibine qoidy.
Astanadaǵy qazaq mektepteriniń kóshin bastaǵan oqý orny tarihtan ózindik ornyn aldy. Mektep-litseidiń alǵashqy direktory Jamal Qasymbektiń kóshbasshylyǵymen 3 jyl qatarynan, 2006, 2007, 2008 jyldary Astana qalasyndaǵy «Úzdik mektep» nominatsiiasyn jeńip alyp, 2011 jyly «Kóshbasshy mektep», 2012 jyly «Úzdik mektep» nominatsiiasyn ielengen edi. 2013 jyly Londondaǵy Halyqaralyq BID sapa boiynsha konventsiia №38 mektepti kemeldiktiń buljymas sapasynyń beriktigi úshin «Altyn táj» IQC júldesimen marapataǵan mektep retinde tarihta ózindik orny bar.
Mektep ashylǵan alǵashqy jyldary oqýshylar sany men oqytý bazasy shekteýli bolǵanymen, mekeme ujymy oqytý sapasyn arttyrý jáne balalardyń jan-jaqty damýyna jaǵdai jasaý úshin aianbai eńbek etti. Ýaqyt óte kele mekteptiń materialdyq-tehnikalyq bazasy nyǵaiyp, muǵalimder quramy sapaly kadrlarmen tolyqty. Bul bilim ordasy tek oqý orny ǵana emes, mádeni ortalyqqa da ainaldy desek bolady.
Mektep ata-analar men oqýshylar úshin bul mektep qazaq tilinde sapaly bilim alýdyń basty ortalyǵy boldy. Munda oqýshylar tek akademiialyq bilim alyp qoimai, ulttyq mádenietpen, ádebietpen, jáne ónermen jaqyn tanysty. Mektepte qazaq halqynyń salt-dástúrlerin dáripteitin túrli is-sharalar, til baiqaýlary, óner saiystary jáne patriottyq tárbieni nasihattaityn sharalar jii uiymdastyryldy.
Mekteptiń shirek ǵasyrlyq mereitoiy barysynda «Mektebime shirek ǵasyr» estelikter kitabynyń tusaýkeseri ótkizildi. Mektepishilik «Álimhan Ermekov» medali osy mektepte eńbek jolyn jas maman bolyp bastap, 15 jyldan astam úzilissiz eńbek etip júrgen ustazdarǵa tabystaldy.
№38 mektep-litseidiń 25 jyldyq mereitoiyna arnalǵan ǵylymi-tanymdyq konferentsiiada Astana qalasy Bilim basqarmasynyń basshysy Qasymhan Senǵazyuly, Astana qalasynyń bala quqyqtary jónindegi ýákili Ásima Bimendina, qoǵam qairatkeri Ákim Ysqaq, álimhantanýshy ǵalym Qanat Óskembaev, EUÝ ekonomikalyq geografiia kafedrasynyń aǵa oqytýshysy Kairat Saǵynov, Pensilvaniia ýniversitetiniń ǵylymi qyzmetkeri, mektep túlegi Ainur Qadyrbaeva, mektepten shyqqan 20 basshynyń atynan sóilegen Sáýle Ázimhanova osy №38 mektebiniń Astananyń bilim tarihyndaǵy kóshbasshylyq beinesi men taǵylymdyq tájiribelerine keń toqtalyp taldady.
Konferentsiia sońy mektep kórkemónerpazdarynyń merekelik kontsertimen jalǵasyp, aitysker aqyn Nartaý Tileýqul tolǵaý arnasa, estrada juldyzy Gúlnur Orazymbetova men jas ánshi Áigerim Tileýbek ánnen shashý shashty.
