Astana alǵash ret júzýden World Aquatics Swimming World Cup 2026 halyqaralyq týrniriniń kezeńin qabyldaidy, dep habarlaidy dalanews.kz.
Jarys 15–17 qazan aralyǵynda elordada ótedi. Astanadaǵy kezeń Silk Road Tour seriiasynyń qorytyndy kezeńi bolmaq.
Biyl World Aquatics Eýraziianyń úsh qalasyn — Baký, Tashkent jáne Astanany — álem kýboginiń biryńǵai baǵytyna biriktirdi. Tarihi Uly Jibek jolynyń qurmetine atalǵan seriianyń alǵashqy kezeńi 1–3 qazanda Bakýde, ekinshisi 8–10 qazanda Tashkentte ótedi. Týrnir 15–17 qazanda Astanada aiaqtalady.
Elordadaǵy kezeń baǵdarlamasyna erler men áielder arasyndaǵy 34 jeke saiys — ár sanat boiynsha 17 distsiplina kiredi. Sonymen qatar erler, áielder jáne aralas estafetalar uiymdastyrylady.
Jarysqa Olimpiada chempiondary men júldegerleri, álem chempionattarynyń júldegerleri jáne qazirgi álem rekordshylary qatarly álemniń úzdik júzgishteri qatysady.
Silk Road Tour aiasyndaǵy úsh kezeńge 50-den astam elden 750-den astam sportshy qatysady dep kútilýde. Seriianyń jalpy júlde qory 1,2 mln dollardy quraidy. Bul soma álemdik rekordtar men basqa da jetistikter úshin beriletin bonýstardy qamtymaidy.
World Aquatics álem kýboginiń kezeńderi iri halyqaralyq jarystarǵa resmi irikteý saiystarynyń qataryna kiredi. Silk Road Tour sportshylar úshin jeltoqsanda Beijińde ótetin 25 metrlik basseindegi álem chempionatyna daiyndyqtyń mańyzdy kezeńi bolmaq.
