Astanada "Aǵaiyndylar" filminiń jabyq kórsetilimi ótti, - dep habarlaidy Dalanews.kz.
"Aǵaiyndylar" – 15-ten astam álemdik marapattarǵa ie bolyp, tájiribeli synshylardyń júregin jaýlap alǵan film. Kinojobany Mádeniet jáne aqparat ministrliginiń, Ulttyq kino ortalyǵynyń qoldaýymen "Golden Man Media" kompaniiasy jaryqqa shyǵarǵan.
Film jelisi boiynsha Aqjol balalar úiinen alystap, ákesiniń tiri ekenine kóz jetkizip, ony izdeýge kirisedi. Kórshisi Dimashpen birge kúnkóris qamymen túzý joldan taiyp, qaraqshylyqpen ainalysady. Týysqandarymen aiaqasty kezdesýlerdiń birinde Aqjol baýyrynyń baryn biledi. Aǵasyn tapqan Aqjol onymen birge ákesin izdeýdi jalǵastyrady. Film drama janrynda, siýjet jelisi eki aǵaiyndynyń shytyrman oqiǵasyna quralǵan.
"Aǵaiyndylar" – rejisser Darhan Tólegenovtyń jarqyn debiýti. Film 2020 jyly Ulttyq kino ortalyǵynyń qoldaýyna ie bolǵan. Tusaýkeseri 2022 jyly nemis kinofestivaliniń Oldenbýrg halyqaralyq kinofestivalinde ótti jáne sol jerde "Kino rýhy" syilyǵymen marapattaldy. Film basynan aiaǵyna deiin sapaly stsenariiimen jáne qorytyndy epizodtarymen kórermenniń nazaryn aýdarady. Kartinada Álisher Ismailov, Aibar Saly, Azat Jumadil, Janel Maqajan jáne Dýlyǵa Aqmolda sekildi akterlar oinaidy.
"Irikteý barysynda debiýtanttarǵa basa mán berdim, kinoǵa qadam basyp jatqan jańa akterlerge basymdyq berildi. Film otbasynyń, jaqyn jandardyń jylýlyǵy mańyzdy ekenin kórsetedi", – deidi rejisser.
Taǵy bir mańyzdy dúnie – "Aǵaiyndylardy" qazaq kinosynyń óte sirek kategoriiasy – art-meinstrimge jatqyzýǵa bolady. Aita ketý qajet, film 22 tamyzda elimizdiń barlyq kinoteatrlaryna jol tartady.
