استانادا "اعايىندىلار" ءفيلمىنىڭ جابىق كورسەتىلىمى ءوتتى، - دەپ حابارلايدى Dalanews.kz.
"اعايىندىلار" – 15-تەن استام الەمدىك ماراپاتتارعا يە بولىپ، تاجىريبەلى سىنشىلاردىڭ جۇرەگىن جاۋلاپ العان فيلم. كينوجوبانى مادەنيەت جانە اقپارات مينيسترلىگىنىڭ، ۇلتتىق كينو ورتالىعىنىڭ قولداۋىمەن "Golden Man Media" كومپانياسى جارىققا شىعارعان.
فيلم جەلىسى بويىنشا اقجول بالالار ۇيىنەن الىستاپ، اكەسىنىڭ ءتىرى ەكەنىنە كوز جەتكىزىپ، ونى ىزدەۋگە كىرىسەدى. كورشىسى ديماشپەن بىرگە كۇنكورىس قامىمەن ءتۇزۋ جولدان تايىپ، قاراقشىلىقپەن اينالىسادى. تۋىسقاندارىمەن اياقاستى كەزدەسۋلەردىڭ بىرىندە اقجول باۋىرىنىڭ بارىن بىلەدى. اعاسىن تاپقان اقجول ونىمەن بىرگە اكەسىن ىزدەۋدى جالعاستىرادى. فيلم دراما جانرىندا، سيۋجەت جەلىسى ەكى اعايىندىنىڭ شىتىرمان وقيعاسىنا قۇرالعان.
"اعايىندىلار" – رەجيسسەر دارحان تولەگەنوۆتىڭ جارقىن دەبيۋتى. فيلم 2020 جىلى ۇلتتىق كينو ورتالىعىنىڭ قولداۋىنا يە بولعان. تۇساۋكەسەرى 2022 جىلى نەمىس كينوفەستيۆالىنىڭ ولدەنبۋرگ حالىقارالىق كينوفەستيۆالىندە ءوتتى جانە سول جەردە "كينو رۋحى" سىيلىعىمەن ماراپاتتالدى. فيلم باسىنان اياعىنا دەيىن ساپالى سەنارييىمەن جانە قورىتىندى ەپيزودتارىمەن كورەرمەننىڭ نازارىن اۋدارادى. كارتينادا الىشەر يسمايلوۆ، ايبار سالى، ازات ءجۇمادىل، جانەل ماقاجان جانە دۋلىعا اقمولدا سەكىلدى اكتەرلار وينايدى.
"ىرىكتەۋ بارىسىندا دەبيۋتانتتارعا باسا ءمان بەردىم، كينوعا قادام باسىپ جاتقان جاڭا اكتەرلەرگە باسىمدىق بەرىلدى. فيلم وتباسىنىڭ، جاقىن جانداردىڭ جىلۋلىعى ماڭىزدى ەكەنىن كورسەتەدى"، – دەيدى رەجيسسەر.
تاعى ءبىر ماڭىزدى دۇنيە – "اعايىندىلاردى" قازاق كينوسىنىڭ وتە سيرەك كاتەگورياسى – ارت-مەينستريمگە جاتقىزۋعا بولادى. ايتا كەتۋ قاجەت، فيلم 22 تامىزدا ەلىمىزدىڭ بارلىق كينوتەاترلارىنا جول تارتادى.
