Astana qalasynyń ákimi Jeńis Qasymbek Instagram-paraqshasynda azyq-túlik qaýipsizdigine bailanysty qandai is-sharalar júzege asyp jatqany týraly jazdy, - dep habarlaidy Dalanews.kz
«Qalamyzda azyq-túlik qaýipsizdigin nyǵaitýǵa septigin tigizetin kásiporyndar ashýdy ary qarai jalǵastyramyz. Búgin tamaq ónerkásibin, logistikany, saýdany jáne t.b. damytatyn jańa ári salynyp jatqan kásiporyndardy aralap shyqtym.
«RnR Group» JShS (Saraishyq aýdany) kásiporyndar kesheniniń jumysymen tanystym. Ol – táýligine 25 tonna ónim shyǵaratyn nan zaýyty jáne kókónis qoimasy (6 myń tonna). 2026 jyly táýligine 100 tonna sút óńdeitin zaýyt ashý josparlanyp otyr. Bul jobaǵa tartylǵan jeke investitsiialar somasy 8,1 mlrd teńgeni qurady. Qazirdiń ózinde 250-ge jýyq jumys orny ashyldy.
Sonymen qatar, «SAIANUR VIP-SERVIS» JShS (Baiqońyr aýdany) zamanaýi kókónis qoimasyna bardym. Investitsiia somasy – 1,8 mlrd teńge, munda 200 jumys orny ashyldy. 8 myń tonna kókónis qoimasy jemis pen kókónis ónimderiniń baǵasyn turaqtandyrýǵa múmkindik beredi.
Biyl jeke investitsiialar esebinen Saraishyq aýdanynda «Tehnodom» («ORPT» AQ) dúkender jelisiniń ortalyq qoimasyn ashý josparlanyp otyr. Jobaǵa tartylǵan investitsiia 11,1 mlrd teńgeni quraidy, sol siiaqty 200-ge jýyq jańa jumys orny ashylmaq.
Máselen, byltyr qalada 49 investitsiialyq joba qoldanysqa berildi. Bul 301 mlrd teńge kóleminde jeke qarjy tartýǵa jáne 4 myń 100 jumys ornyn ashýǵa septigin tigizdi.
Biyl taǵy 55 investitsiialyq jobany iske qosý josparlanyp otyr. Investitsiialyq shtabtarda qalamyz ben turǵyndarymyz úshin mańyzdy jobalarǵa qoldaý bildiremiz. Biz ár jobany jeke-jeke qarastyryp, investorlarǵa jan-jaqty qoldaý kórsetemiz», – dep jazdy elorda ákimi.
