Prezident Toqaev Úkimettiń keńeitilgen otyrysynda Astana ákimi Jeńis Qasymbekke qala kóshelerinde qalyptasqan kólik keptelisin shuǵyl sheshýdi tapsyrdy, dep habarlaidy Dalanews.kz.
Memleket basshysynyń pikirinshe, ákimdiktiń jumysy júieli júrip jatqany baiqalǵanymen, astanadaǵy transporttyq másele áli de ózekti.
“Ákimniń tájiribesi bar, qalanyń jumysyn úilestire alady. Degenmen elordadaǵy kólik keptelisin joiý úshin shuǵyl sheshimder qabyldaý qajet”, – dedi Toqaev.
Astana turǵyndary men kólik júrgizýshileri uzaq ýaqyt boiy negizgi joldar men kóshelerde oryn alatyn keptelis jaiyn aityp, áleýmettik jelilerde jii shaǵymdanyp keledi. Jergilikti bilik birqatar infraqurylymdyq jobany qolǵa alǵanyn málimdese de, Prezident bul baǵytta “sheshýshi qadamdarǵa barý kerektigin” eskertti.
Búgingi keńeitilgen otyrysta Úkimet pen ákimderdiń tiimdiligi ekonomikalyq kórsetkishtermen ólshenetini atap ótildi. Prezidentke óńirlerdegi áleýmettik jáne infraqurylym máselelerin sheshý barysy týraly esep usynylýda.
Sondai-aq Toqaev otyrys barysynda Ulttyq banktiń qyzmetin synǵa alyp, burynǵy ustanymdardyń qazirgi kúrdeli jaǵdaida tiimsiz ekenin málimdedi. Ol retteýshi organ men Úkimettiń tyǵyz yntymaqta jumys isteýi qajettigin taǵy bir márte eskertti.
Sarapshylar kólik keptelisiniń Astana halqynyń turmys sapasyna tikelei áser etetinin jáne aldaǵy ýaqytta tiimdi kóliktik sheshimder qabyldaý mańyzdy ekenin aitady. Al bilik ókilderi bul máseleni sheshý úshin jańa infraqurylymdyq jobalar men qoǵamdyq kólik júiesin jetildirýdi josparlap otyr.
Sonymen qatar, Memleket basshysyna LRT qurylysy boiynsha esep bergen Jeńis Qasymbek joba qurylysy 2025 jyldyń jazynda tolyq aiaqtalatynyn aitty.
«Qalalyq baǵyttar boiynsha kún saiyn 1600-den astam avtobýs jolǵa shyǵady. Eki jyl ishinde elordadaǵy qoǵamdyq kólik parki 45 paiyzǵa jańartyldy. Sizdiń qoldaýyńyzdyń arqasynda LRT jobasy márege jaqyndap qaldy. Jaz aiynda qurylys jumystary tolyq aiaqtalady. Qyrkúiek aiynda alǵashqy poiyzdar keledi, sodan keiin belsendi synaqtan ótkizý kezeńi bastalady. Qalada zamanaýi ári jaily ekologiialyq beineni qalyptastyrý baǵytynda qyzý jumys jalǵasyp jatyr», – dedi ol.
Ákimniń sózinshe, 2024 jyldyń jeltoqsanynda kólik júiesin damytýdyń keshendi baǵdarlamasy bekitilgen.
«Sizdiń tapsyrmańyz boiynsha Úkimet Astana qalasynyń jańa bas josparyn bekitti. Qazirgi kezde elordanyń barlyq tirshilik qamtamasyz etý nysandary turaqty jumys istep tur. Qaladaǵy kólik qozǵalysynyń qarqyndy ósýin eskerip, qoǵamdyq kólikti damytýǵa, joldardyń ótkizý qabiletin arttyrýǵa, jańa kópirler salýǵa, avtoturaq keńistikteriniń jumysyn jetildirýge basymdyq berilip otyr», – dedi ákim.
