«EKSPO – 2017» halyqaralyq kórmesi, Bolashaqqa baǵdar: «Rýhanı jańǵyrý» baǵdarlamasy aıasynda ótip jatqan Ońtústik Qazaqstan oblysynyń Astanadaǵy kúnderinde ózderiniń qaıtalanbas qoltańbalaryn qaldyrǵan 20 sýretshiniń tańdaýly 45 jumysy kórermen kózaıymyna aınaldy.
Munda halyq nazaryna ilinip, kelýshilerdiń qyzyǵýshylyǵyn týdyrǵan eki sýretshiniń týyndysyna toqtala ketsek. Onyń biri halyq sýretshisi Gýlfaırýs Ysmaıylovanyń «Nakıpovanyń portreti» bolsa, ekinshisi Sabyr Mámbeevtiń «Ystyq kól» týyndysy.
Sondaı-aq, kórmede Qazaqstannyń eńbek sińirgen óner qaıratkeri Toqbolat Toǵysbaevtyń «Uıqydaǵy bala», Qazaqstannyń eńbek sińirgen qaıratkeri Ospanov Aınabektiń «Baqytty kún», Qazyǵulov Alpysbaıdyń «Jolda», Mahanbetov Seısenhannyń «Túlkibas taýlary», Qystaýbaev Kerimbaıdyń «Taý samaly», QR eńbek sińirgen óner qaıratkeri Shoranov Óserbaıdyń «Hana kene» sýretteri kórmeniń qundy jádigerleri bolyp tabylady.
Ońtústik óńiri sýretshileriniń shyǵarmashylyq jumystaryn, sheberlik ónerin, ólkemizdiń salt-dástúri men ulttyq mádenıetin nasıhattaý maqsatynda uıymdastyrylǵan sharada Ońtústiktiń ózindik tabıǵı geografıalyq erekshelikteri men kóz tartarlyq oryndary jáne tereń tarıhtan syr shertetin kıeli jerlerin beıneleıtin halyqaralyq deńgeıdegi óner shyǵarmalary qalyń jurtshylyq nazaryna usynyldy.
OQO ákiminiń baspasóz qyzmeti
