Elordadaǵy Táýelsizdik saraıyna Shanhaı yntymaqtastyq uıymyna múshe memleketterdiń basshylary uıym keńesiniń shaǵyn quramdaǵy otyrysy QR Prezıdenti Nursultan Nazarbaevtyń tóraǵalyǵymen ótip jatyr, dep habarlaıdy QazAqparat.
– Osynda otyrǵan barlyqtaryńyzdyń atynan Prezıdent bolyp saılanǵannan keıin bizdiń Memleket basshylary keńesimizge alǵash ret qatysyp otyrǵan Shavkat Mırzıeevke aıryqsha hosh keldińiz demekpin jáne oǵan qyzmetinde jáne birlesken jumysymyzda zor tabystar tileımin. Aǵymdaǵy jyly SHYU-ǵa 16 jyl tolady. Osyndaı sátte tarıh eske túsedi. 5 memleket Qytaı Halyq Respýblıkasymen shekara problemalaryn sheship, qujatqa qol qoıǵannan keıin sol kezdegi Qytaıdyń Tóraǵasy Szán Szemın myrza ekeýimiz «shekaraǵa qol qoıylǵannan keıin jyraqtap ketpeı, ekonomıkalyq yntymaqtastyq uıymdastyraıyq» dep usynǵan edik. Osylaısha SHYU dúnıege keldi jáne sol tarıhı aktige qol qoıý rásimine qatysqan Rahmon myrza ekeýimiz barlyǵyna kýá bolyp kelemiz, – dedi otyrysty ashqan Memleket basshysy.
QR Prezıdenti uıym sol ýaqyttan bastap halyqaralyq tanymaldyqqa ıe bolyp, kópbeıindi ózara is-qımyldyń tıimdi alańyna aınalǵanyn, óńirdegi qaýipsizdik nyǵaıtý, ekonomıkalyq yntymaqtastyqty tereńdetý, múshe elder arasyndaǵy mádenı-gýmanıtarlyq yntymaqtastyqty keńeıtý boıynsha úlken jumystar atqarylǵanyn atap ótti.
Salmaqty sharttyq-quqyqtyq baza qalyptastyrylyp, myǵym ınstıtýsıonaldyq negiz qurylǵan, óńirlik jáne jahandyq mártebesi kúsheıe túskendigin aıtty.
– Astana samıtinde bizdiń uıymymyzdyń jańa tarıhy bastalady dep aıtsaq ta bolady. Bul jolǵy otyrys buǵan deıingideı altyjaqty formatta sońǵy ret ótkeli otyr. Búgin biz Úndistan men Pákistan Islam Respýblıkasyn SHYU-ǵa qabyldaý prosesin aıaqtap, múshe memleket mártebesin berý týraly sheshimge qol qoıýǵa ýaǵdalastyq. Jańa músheni qabyldaý uıymnyń damýyna jańa tyń serpin berip, onyń halyqaralyq bedeliniń ósýine óz septigin tıgizedi, – dedi Nursultan Nazarbaev.
Shaǵyn quramdaǵy otyrysqa QHR Tóraǵasy Sı Szınpın, Ózbekstan Prezıdenti Shavkat Mırzıeev, Qyrǵyzstan Prezıdenti Almazbek Atambaev, Reseı Prezıdenti Vladımır Pýtın, Tájikstan Prezıdenti Emomalı Rahmon qatysýda.
